ਜ਼ਿੰਦਗੀ ਦੇ ਰੰਗ (ਕਵਿਤਾ)

ਗੁਰਦਰਸ਼ਨ ਸਿੰਘ ਮਾਵੀ   

Email: gurdarshansinghmavi@gmail.com
Cell: +91 98148 51298
Address: 1571 ਸੈਕਟਰ 51ਬੀ
ਚੰਡੀਗੜ੍ਹ India
ਗੁਰਦਰਸ਼ਨ ਸਿੰਘ ਮਾਵੀ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਦੀਵਾ ਜਗਦਾ ਰੱਖਣਾ ਹੋਵੇ
ਕੁਝ ਸੇਕ ਤਾਂ ਸਹਿਣਾ ਪੈਂਦਾ
ਸ਼ਬਦਾਂ ਵਿਚੋਂ ਅਰਥ ਕੱਢਣ ਲਈ 
ਪੜ੍ਹਨਾ, ਸੁਣਨਾ, ਕਹਿਣਾ ਪੈਂਦਾ 
ਜਿੰਦਗੀ ਵਿੱਚ ਜੇ ਸਿਖਿਆ ਲੈਣੀ 
ਸਿਆਣਿਆਂ ਕੋਲੇ ਬਹਿਣਾ ਪੈਂਦਾ 
ਸ੍ਵੈ- ਮਾਨ ਨੂੰ ਕਾਇਮ ਜੇ ਰੱਖਣਾ 
ਵੈਰੀ ਦੇ ਸੰਗ ਖਹਿਣਾ ਪੈਂਦਾ 
ਸਾਗਰ ਅੰਦਰੋਂ ਜੇ ਮੋਤੀ ਚੁਗਣੇ
ਕਿਸ਼ਤੀਆਂ ਵਿਚੋਂ  ਲਹਿਣਾ ਪੈਂਦਾ 
ਤਾਨਾਸ਼ਾਹ ਜੇ ਹਾਕਮ ਹੋਵੇ
ਹਾਂ ਜੀ, ਹਾਂ ਜੀ ਕਹਿਣਾ ਪੈਂਦਾ 
ਜੁਲਮ ਦੀ ਜੇ ਹੱਦ ਹੋ ਜਾਵੇ 
ਸੂਰਮਿਆਂ ਨੂੰ ਫਿਰ ਡਹਿਣਾ ਪੈਂਦਾ 
ਲੋਕੀਂ ਜਦੋਂ ਇਕ ਮੁੱਠ ਹੁੰਦੇ
ਰਾਜੇ, ਰਾਣਿਆਂ ਨੂੰ ਢਹਿਣਾ ਪੈਂਦਾ 
ਤਖਤ-ਤਾਜ ਸਭ ਭੁੱਲ ਜਾਂਦੇ ਨੇ 
ਧਰਤੀ ‘ਤੇ ਲੰਮੇ ਪੈਣਾ ਪੈਂਦਾ 
ਜਿੰਦਗੀ ਦੇ ਰੰਗ ਦੇਖ ਤੂੰ “ਮਾਵੀ “
ਰਬੱ ਦੀ ਰਜਾਅ ‘ਚ ਰਹਿਣਾ ਪੈਂਦਾ