ਅੱਜ ਕੱਲ੍ਹ ਦਾ ਜਵਾਨ (ਕਵਿਤਾ)

ਖੂਨ ਦੇ  ਹੋਲੀ ਖੇਡਣ  ਲੱਗਾ ਅੱਜ  ਕੱਲ੍ਹ ਦਾ  ਜਵਾਨ 

ਕਾਹਦਾ  ਤੂੰ  ਪੰਜਾਬੀ  ਸੱਜਣਾ ਕਾਹਦਾ  ਤੇਰੇ  ਤੇ ਮਾਨ

ਗੁਰੂ  ਘਰਾਂ ਦੇ  ਵਿੱਚ ਤੂੰ  ਜਾ ਕੇ  ਗੰਦੇ  ਗੀਤ  ਵਜਾਵੇ

ਕੈਸਾ ਤੂੰ  ਕਿਰਦਾਰ  ਬਣਾਇਆ ਤੈਨੂੰ ਸ਼ਰਮ ਨਾ ਆਵੇ

ਮਾਰ  ਮੁਕਾ ਤਾਂ  ਪੁੱਤਰ ਮਾਂ  ਦਾ ਬਾਪ  ਦਾ ਪੁੱਤ ਜਵਾਨ

ਮਾਰ  ਕੇ ਚੀਕਾਂ  ਭੈਣ  ਪਈ  ਰੋਵੇ ! ਰੋਵੇ  ਕੁੱਲ ਜਹਾਨ

ਘਰਾਂ ‘ਚ ਡੱਕ ਲਓ ਪੁੱਤ ਮਾਰਦੇ  ਫਿਰਦੇ ਗਲੀ ਦਰਿੰਦੇ

ਅੱਖਾਂ ਬੰਦ ਕਰ ਚੁੱਪ ਹੋ ਬਹਿ ਜੋ ਜ਼ਬਾਨ ਤੇ ਲਾਲੋ ਜਿੰਦੇ 

ਸੱਚ  ਬੋਲਣ  ਤੇ  ਟੰਗ  ਦਿੰਦੇ  ਨੇ  ਗਲੀ  ਮੋੜ  ਚੁਰਾਹੇ 

ਕਿਸ  ਪਾਸੇ ਨੂੰ  ਤੁਰੀ ਜਵਾਨੀ  ਪੈ ਗਈ  ਕਿਸ ਕੁਰਾਹੇ

ਧੀਆਂ  ਛੇੜਨ  ਪੁੱਤਰ  ਮਾਰਨ  ਡਰਦਾ  ਕੋਈ ਨਾ ਬੋਲੇ

ਕਾਹਦੇ  ਪਿਆ  ਜੈਕਾਰੇ  ਲਾਵੇ  ਕਾਹਦੇ ਗਾਵੇ  ਸੋਹਿਲੇ

ਘਰ ਬੈਠਿਆ ਨਿੱਤ  ਫੇਸਬੁੱਕ ਤੇ  ਲੋਕਾਂ  ਨੂੰ ਮੱਤਾਂ ਦਿੰਦਾ

ਤੇਰੇ  ਸਾਹਵੇਂ  ਪੁੱਤ ਮਾਰ ਤਾ ਤੂੰ  ਹੋਇਆ  ਨਾ ਸ਼ਰਮਿੰਦਾ

ਕੰਗ ਚੁੱਪ ਬੈਠ ਕੇ ਵੇਖ ਤਮਾਸ਼ਾ ਗੱਲ ਕਦੇ ਨਾ  ਬਣਨੀ

ਅੱਜ ਓਸ ਘਰ ਅੱਗ ਵੇ ਸੱਜਣਾ ਤੇਰੇ ਘਰ ਵੀ ਬਲ਼ਣੀ।