ਸਰਵਰ ਡਾਊਨ
ਹੁਣ ਤਾਂ ਜਰਨੈਲ ਸਿੰਹਾਂ, ਆਹ ਕੰਪਿਊਟਰ ਜਿਹੇ ਕਰਕੇ, ਸਾਰੇ ਕੰਮ ਛੇਤੀ ਹੋ ਜਾਂਦੇ ਨੇ, ਪਹਿਲਾਂ ਤਾਂ ਸਰਕਾਰੀ ਮੁਲਾਜ਼ਮ ਇਹ ਕਹਿ ਕੇ ਟਾਲ ਦਿੰਦੇ ਸੀ ਕਿ, 'ਵੱਡੇ ਸਾਹਿਬ ਨਹੀਂ ਆਏ ਅੱਜ' ਜਾਂ 'ਉਹ ਅੱਜ ਛੁੱਟੀ ਤੇ ਹਨ।' ਤਰੱਕੀ ਤੇ ਆ ਦੇਸ਼ ਆਪਣਾ.. ਉਜਾਗਰ ਸਿੰਘ ਨੇ ਖੁਸ਼ੀ ਜਿਹੀ ਜ਼ਾਹਰ ਕਰਦੇ ਕਿਹਾ..
ਕਿੱਥੇ ਉਜਾਗਰ ਸਿੰਹਾਂ ? ਮੈਨੂੰ ੧੦ ਦਿਨ ਹੋ ਗਏ ਅੱਜ ਦਫ਼ਤਰ ਜਾਂਦਿਆਂ, ਹੁਣ ਤਾਂ ਸਾਰਾ ਸਟਾਫ ਏ.ਸੀ ਥੱਲੇ ਬੈਠਾ ਹੁੰਦਾ ਕੰਪਿਊਟਰ ਦੇ ਅੱਗੇ ਅੱਖਾਂ ਜਿਹੀਆਂ ਟੱਢ ਕੇ, ਤੇ ਵੱਡਾ ਸਾਹਬ ਵੀ ਨਾਲ ਹੀ.. ਪਰ ਕੰਮ ਤਾਹਵੀਂ ਨਹੀਂ ਕਰਦੇ, ਇਹ ਆਖ ਕੇ ਗੱਲ ਮੁਕਾ ਦਿੰਦੇ ਆ ਕਿ, 'ਭਾਈ ਪਿੱਛੋਂ ਸਰਵਰ ਡਾਊਨ ਆ, ਅਸੀਂ ਕੁੱਝ ਨਹੀਂ ਕਰ ਸਕਦੇ..' ਕੱਲ੍ਹ ਆਇਓ!
ਠੇਕੇ ਤੇ
ਯਾਰ ਆਹ ਭਲਾ ਅਧਿਆਪਕਾਂ ਦਾ ਕੀ ਕੰਮ ਆ ਠੇਕੇ ਤੇ? ਅਧਿਆਪਕਾਂ ਦਾ ਕੰਮ ਤਾਂ ਬੱਚਿਆਂ ਨੂੰ ਆਹ ਸ਼ਰਾਬ, ਨਸ਼ਿਆਂ ਅਤੇ ਠੇਕੇ ਤੋਂ ਦੂਰ ਰਹਿਣ ਲਈ ਸਮਝਾਉਣਾ ਅਤੇ ਤਿਆਰ ਕਰਨਾ ਹੁੰਦਾ.. ਝੰਡਾ ਅਮਲੀ ਹੈਰਾਨ ਜਿਹਾ ਹੁੰਦਾ ਹੋਇਆ, ਉਜਾਗਰ ਸਿੰਘ ਨੂੰ ਪੁੱਛਣ ਲੱਗਾ..
ਉਜਾਗਰ ਸਿੰਘ ਨੂੰ ਪਹਿਲਾਂ ਤਾਂ ਸੁਆਲ ਹੀ ਸਮਝ ਨਾ ਆਇਆ ਪਰ ਜਦ ਵਿਸਥਾਰ ਨਾਲ ਪੁਛਿਆ ਤਾਂ ਝੰਡੇ ਨੇ ਦੱਸਿਆ ਕਿ ਕੱਲ੍ਹ ਮੈਂ ਸੁਣਿਆ ਸੀ ਕਿਸੇ ਤੋਂ ਕਿ ਸਰਕਾਰ ਨੇ ਅਧਿਆਪਕ ਹੁਣ ਠੇਕੇ ਤੇ ਰੱਖਣੇ ਸ਼ੁਰੂ ਕਰ ਦਿਤੇ ਆ..
ਨੇਤਾ
ਭਾਈ ਉਜਾਗਰ ਸਿੰਹਾਂ, ਮੁੰਡਾ ਤੇਰਾ ਵੱਡਾ ਹੋਈ ਜਾਂਦਾ, ਇਹਨੂੰ ਸਕੂਲ ਕਾਹਤੋਂ ਨਹੀਂ ਪਾਉਂਦਾ ਪੜ੍ਹਨੇ ਨੂੰ?
ਨਾ ਭਾਈ ਬਿਸ਼ਨਿਆ, ਮੈਂ ਨਹੀਂ ਚਾਹੁੰਦਾ ਪੜ੍ਹ ਲਿਖ ਕੇ ਕਿਸੇ ਨਿੱਕੀ ਵੱਡੀ ਕੰਪਨੀ ਵਿੱਚ ਲੱਗ ਕੇ ਉਸ ਕੰਪਨੀ ਨੂੰ ਚਲਾਵੇ, ਮੈਂ ਤਾਂ ਚਾਹੁੰਦਾ ਇਹ ਪੂਰਾ ਦੇਸ਼ ਹੀ ਚਲਾਵੇ, ਬੱਸ ਤਾਹੀਂ ਨਹੀਂ ਪਾਇਆ ਸਕੂਲੇ।
