ਆਪਣੇ ਰੂ-ਬ-ਰੂ (ਕਵਿਤਾ)

ਸੁਰਜੀਤ ਕੌਰ   

Email: surjitk33@gmail.com
Address: 33 Bonistel Crescent
Brampton, Ontario Canada L7A 3G8
ਸੁਰਜੀਤ ਕੌਰ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਆਪਣੇ ਘਰ ਅੰਦਰ 
ਉੱਸਰ ਰਹੀਆਂ ਕੰਧਾਂ ਨੂੰ  ਵੇਖ
ਕੰਧਾਂ ਤੇ ਉਕਰੇ
ਨਫ਼ਰਤ ਦੇ ਦੰਦਾਂ ਨੂੰ ਵੇਖ 
ਆਪਸ ਵਿਚ ਉਲਝ ਗਏ
ਰਿਸ਼ਤਿਆਂ ਦੇ ਤੰਦਾਂ ਨੂੰ ਵੇਖ
ਅੰਦਰੋ ਅੰਦਰੀਂ ਉਬਲ ਰਹੇ
ਭਾਵਾਂ ਦੇ ਜੰਗਾਂ ਨੂੰ ਵੇਖ !
 
ਸਮਾਂ ਹੈ ਤੇ ਬਹਿ ਕੇ ਧੁੰਦ 'ਚ ਸਜੀ
ਆਪਣੀ ਬੈਠਕ ਦੀ ਸਜਾਵਟ ਨੂੰ ਵੇਖ
ਖਾਮੋਸ਼ ਪਏ 
ਪੱਥਰ ਦੇ ਬੁੱਤਾਂ ਦੀ ਬਨਾਵਟ ਨੂੰ ਵੇਖ
ਘੋੜਿਆਂ ਵਾਂਗ ਸਰਪਟ ਦੌੜ ਰਹੇ
ਸਾਹਾਂ ਦੀ ਘਬਰਾਹਟ ਨੂੰ ਵੇਖ
ਆਪਣੇ ਹੀ ਬੂਹੇ ਅੱਗਿਓਂ
ਲੰਘ ਜਾਨੈ ਓਪਰਿਆਂ ਵਾਂਗ
ਕਦੇ ਅੰਦਰ ਆਕੇ 
ਉਬਲ ਰਹੇ ਵਲਵਲਿਆਂ ਦੀ
ਤਰਾਵਟ ਨੂੰ ਵੇਖ !
 
ਜਲ ਉੱਠਣ ਬੁਝ ਗਏ ਸ਼ਮਾਦਾਨ
ਕੋਈ ਚਿਣਗ ਉਧਾਰੀ ਹੀ ਲੈ ਆ
ਕਿ ਸੜਦੇ ਰਹਿਣਾ ਨਹੀਂ ਹੈ ਜ਼ਿੰਦਗੀ
ਮੁਸਕਣੀਆਂ ਦੇ ਕੁਛ ਦੀਪ ਜਲਾ ਕੇ
ਆਪਣੇ ਘਰ ਦੀ ਜਗਮਗਾਹਟ ਤਾਂ ਵੇਖ !
 
ਸਮਾਂ ਹੈ ਤੇ ਬਹਿ ਕੇ ਧੁੰਦ 'ਚ ਸਜੀ
ਆਪਣੀ ਬੈਠਕ ਦੀ ਸਜਾਵਟ ਨੂੰ ਵੇਖ !