ਸੱਜਣਾਂ ਨੇ ਲਾਰਿਆਂ 'ਚ ਰੱਖਿਆ (ਗੀਤ )

ਨਾਇਬ ਸਿੰਘ ਬੁੱਕਣਵਾਲ   

Email: naibsingh62708@gmail.com
Cell: +91 94176 61708
Address: ਪਿੰਡ ਬੁੱਕਣਵਾਲ ਤਹਿ: ਮਲੇਰਕੋਟਲਾ
ਸੰਗਰੂਰ India
ਨਾਇਬ ਸਿੰਘ ਬੁੱਕਣਵਾਲ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਅਸੀਂ ਆਸਾਂ ਦੇ ਬਨ੍ਹੇਰਿਆਂ ਤੇ, ਰੱਖ ਦੇ ਦੀਵੇ ਵੀ ਉਡੀਕ ਦੇ ਰਹੇ।
ਉਹਨਾਂ ਲੰਮੀਆਂ ਉਡਾਰੀਆਂ ਵੀ ਮਾਰੀਆਂ, ਵਾਅਦੇ ਕੀਤੇ ਯਾਦ ਨਾ ਰਹੇ।
ਉਹਨਾਂ ਮੁੜ ਖ਼ਤ ਵੀ ਕਦੇ ਨਾ ਪਿਆ, ਸਾਡੇ ਨੈਣੀ ਹੰਝੂ ਮੁੱਕ ਗਏ।
ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……

ਰੁੱਤਾਂ ਚੱਕਰ ਬਦਲ-ਬਦਲ ਥੱਕੀਆਂ, ਉਹਨਾਂ ਲਈ ਸਭ ਮੁੱਕੀਆ।
ਨਹਿਰਾਂ ਜੋਬਨ ਤੇ ਜਿਹੜੀਆ ਸੀ ਵਗਦੀਆਂ, ਹੁਣ ਤਾਂ ਉਹ ਜਾਣ ਸੁੱਕੀਆਂ
ਜਿਹੜੇ ਗ਼ੁਲਾਬ ਸੀ ਕਦੇ ਮਹਿਕਾਂ ਵੰਡਦੇ, ਹੁਣ ਉਹ ਗ਼ੁਲਾਬ ਸੁੱਕ ਗਏ।
'ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……

ਨਾ ਆਉਣ ਦੀਆਂ ਤਰੀਕਾਂ ਕਦੇ ਦੱਸੀਆਂ, ਸਾਡੀਆਂ ਅੱਖੀਆਂ ਉਡੀਕ-ਉਡੀਕ ਥੱਕੀਆਂ।
ਜਾਵੇ ਰੁੱਤ ਵੀ ਫੱਗਣ ਵਾਲੀ ਲੰਘਦੀ, ਅਸੀਂ ਫਿਰ ਵੀ ਆਸ ਤੇ ਕੱਢੀਆਂ ਪੱਖੀਆਂ।
ਜਿਹੜੇ ਦਿੱਤੇ ਸੀ ਜ਼ਖ਼ਮ ਉਹਨਾਂ ਅੱਲ੍ਹੇ, ਉਹ ਹੁਣ ਨਸੂਰ ਦੁੱਖ ਗਏ।
ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……

ਜਾਵੇ ਸਾਹਾਂ ਦੀ ਡੋਰ ਹੁਣ ਟੁੱਟਦੀ, ਜ਼ਿੰਦ ਘੜੇ'ਚੋ ਪਾਣੀ ਵਾਂਗੂੰ ਮੁੱਕਦੀ।
ਭਾਵੇਂ ਅੱਖੀਆਂ ਨੂੰ ਅਜੇ ਵੀ ਉਡੀਕ ਆ, ਪਰ ਸਮੇਂ ਦੀ ਸੂਈ ਨਾ ਕਦੇ ਰੁੱਕਦੀ।
ਇਹ ਪਿੰਜ਼ਰ ਵੀ ਲਾਸ਼ ਬਣ ਰਹਿ ਗਿਆ, ਸੁਪਨਿਆਂ ਦੇ ਜਾਲ਼ ਟੁੱਟ ਗਏ।
ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……

ਤੇਰੇ ਲਈ ਸੀ ਸ਼ਿੰਗਾਰ ਅਸੀਂ ਕਰਦੇ, ਫ਼ੱਗਣ ਮਹੀਨੇ ਜਿਵੇਂ  ਫ਼ਸਲਾਂ।
ਸ਼ੁੱਧ-ਬੁੱਧ ਹੁਣ ਸਾਡੀ ਖੋ ਗਈ, ਦੇਗੀਆਂ ਜਵਾਬ ਹੁਣ ਅਕਲਾਂ।
ਜਿਹੜਾ  ਲਿਖਿਆ ਸੀ ਨਾਮ ਨਾਲ ਸੱਧਰਾਂ, ਉਹ ਤਾਂ ਹੁਣ ਅੱਖਰ ਵੀ ਲੁਕ ਗਏ
ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……

'ਨਾਇਬ' ਪਿਆਰ ਹੀ ਰੱਬ ਦਾ ਨਾਂ ਆ, ਦਿਲ ਇਹਦੇ ਕਰਕੇ ਹੀ ਆਪਣੀ ਥਾਂ ਆ।
ਸੋਚਿਆ ਹੋਣਾ ਨੀ 'ਬੁੱਕਣਵਾਲ' ਪਿੰਡ ਨੇ, 'ਨਾਇਬ' ਸੁੱਖੀ ਸਾਂਦੀ ਵਸਦਾ ਹੀ ਤਾਂ ਆ।
ਜਿਹੜੇ ਰੁੱਖਾਂ ਦੀਆਂ ਛਾਵਾਂ ਥੱਲੇ ਬੈਠੇ ਸੀ, ਉਹ ਹੁਣ ਰੁੱਖ ਵੀ ਪੁੱਟ ਲਏ।
ਸਾਨੂੰ ਸੱਜਣਾਂ ਨੇ ਲਾਰਿਆਂ'ਚ ਰੱਖਿਆ, ਜ਼ਿੰਦਗੀ ਦੇ ਪੈਡੇਂ ਮੁੱਕ ਗਏ……