ਆਪਣਿਆਂ ਤਾਈਂ ਹਰ ਦਮ ਗਲੇ ਲਗਾਉਂਦਾ ਹਾਂ
ਵੇਖ ਪਰਾਇਆ ਫਿਰ ਵੀ ਮੈਂ ਮੁਸਕਾਉਂਦਾ ਹਾਂ।
ਜਿੱਤਾਂ ਰਹਿਣ ਹਮੇਸ਼ਾ ਮੇਰੇ ਅੰਗ ਸੰਗ ਹੀ
ਯਾਰਾਂ ਨੂੰ ਵੀ ਘੁੱਟ ਕਲੇਜੇ ਲਾਉਂਦਾ ਹਾਂ।
ਕੀਨਾ, ਸਾੜਾ, ਨਫਰਤ ਮੈਥੋਂ ਦੂਰ ਰਹੇ
ਤਾਂ ਹੀ ਰੁੱਸ ਗਏ ਮਿੱਤਰਾਂ ਤਾਈਂ ਮਨਾਉਂਦਾ ਹਾਂ।
ਪਿਆਰ ਮੁਹੱਬਤ ਬੜੇ ਸਮੁੰਦਰੋਂ ਡੂੰਘੇ ਨੇ
ਫਿਰ ਦਰਿਆਵਾਂ ਦੇ ਵਿਚ ਗੋਤੇ ਲਾਉਂਦਾ ਹਾਂ।
ਰੱਬ ਰਹੀਮ ਤੇ ਅੱਲਾ ਇਸ ਵਿਚ ਦਿਸਦੇ ਨੇ
ਬੰਦੇ ਅੱਗੇ ਤਾਹੀਂੈਉਂ ਸੀਸ ਝੁਕਾਉਂਦਾ ਹਾਂ।
ਮੈਂ ਨਹੀਂ ਬੱਸ ਤੂੰ ਹੀ ਤੂੰ ਦਾ ਸਾਜ਼ ਸੁਣੇ
ਭੁੱਲ ਜਾਂ ਆਪਾ ਜਦੋਂ ਵਜ਼ਦ ਵਿਚ ਆਉਂਦਾ ਹਾਂ।
' ਕਾਉਂਕੇ' ਨਾਲ ਵੀ ਤਾਹੀਉਂ ਮੇਰੀ ਬਣਦੀ ਹੈ
ਸਭ ਦੀ ਬੁੱਕਲ ਵਿਚ ਮੈਂ ਸੋਹਲੇ ਗਾਉਂਦਾ ਹਾਂ।