ਮਿਸ਼ਰ ਦੇ ਲੋਕਾਂ ਦੇ ਨਾਮ
(ਕਵਿਤਾ)
ਤੁਸਾਂ ਕਰ ਵਿਖਾਇਆ
ਮਿਸ਼ਰ ਦੇ ਬਾਸ਼ਿੰਦਿਉ
ਤੁਸਾਂ ਕਰ ਵਿਖਾਇਆ
ਅਸੀਂ ਭਾਵੇਂ ਜਿਸਮਾਨੀ ਤੌਰ ਤੇ
ਸ਼ਾਮਿਲ ਨਹੀਂ ਸਾਂ
ਸੰਘਰਸ਼ ਕਰ ਰਹੇ ਤੁਹਾਡੇ ਸੂਰਮਿਆਂ ਵਿਚਕਾਰ
ਪਰ ਜਿਹਨੀ ਤੋਰ ਤੇ ਹਾਮੀ ਭਰਦੇ ਹਾਂ ਤੁਹਾਡੀ ਦ੍ਰਿੜਤਾ ਦੀ
ਤੁਹਾਡੇ ਜਜ਼ਬਿਆਂ ਨੇ
ਤੁਹਾਡੀ ਸੋਚ ਦੀ ਉਂਗਲ ਫੜ
ਸਮੇਂ ਦੀ ਤਖਤੀ ਤੇ
ਜੋ ਪੂਰਨੇ ਪਾ ਦਿਤੇ ਨੇ
ਉਸਦੀ ਚਿਣਗ
ਰਹਿੰਦੀ ਦੁਨੀਆਂ ਤੱਕ
ਮਨ ਮਸਤਕ ਦੀਆਂ ਬਰੂਹਾਂ ਉਤੇ
ਦਸਤਕ ਦੇਂਦੀ ਰਹੂੰ
ਸਾਨੂੰ ਵੀ ਸ਼ਾਮਿਲ ਸਮਝੋ
ਆਪਣੇ ਜਸ਼ਨ ਦਿਆਂ ਰੰਗਾਂ ਵਿਚ
ਅੱਜ ਕਾਇਰੋ ( ਕਾਹਿਰਾ )
ਦੁਨਿਆ ਦੇ ਨਕਸ਼ੇ ਤੇ
ਵਿਲੱਖਣ ਪਹਿਚਾਨ ਦਾ ਧੁਰਾ ਬਣ ਬਹੁੜਿਆ
ਤੇ ਪੂਰੇ ਵਿਸ਼ਵ ਲਈ ਰਾਹ ਦਸੇਰਾ ਹੋ ਨਿਬੜਿਆ
ਕਾਹਿਰਾ ਦਾ ਤਹਰੀਰ ਚੌਕ
ਤੁਸਾਂ ਦੱਸ ਦਿੱਤਾ
ਕਿ ਨਿਜਾਮ ਸਦਾ ਲਈ
ਬੰਦੁਆ ਮਜਦੂਰ ਬਣਿਆ ਨਹੀਂ ਰਹਿ ਸਕਦਾ
ਤੇ ਨਾ ਹੀ ਸੱਤਾ
ਬਹੁਤੀ ਦੇਰ
ਕਿਸੇ ਦੀ ਰਖੇਲ ਬਣਾ ਕੇ ਰੱਖੀ ਜਾ ਸਕਦੀ ਹੈ
ਹੱਕਾਂ ਲਈ ਜੂਝਦੀ
ਸਬਰ ਦੇ ਅੰਤਿਮ ਹੱਦ ਟੱਪ
ਅਸਲੋਂ ਹੀ ਘਿਸ ਚੁੱਕੀ
ਕਿਰਤੀਆਂ ਦੀ ਦਾਤੀ
ਜਦੋਂ ਨਿਡਰਤਾ , ਦ੍ਰਿੜਤਾ ਤੇ ਏਕੇ ਦੇ ਸੇਕ ਨਾਲ
ਤਿਖੀ ਹੋਈ ਹੁੰਦੀ ਹੈ
ਤਾਂ ਚਰੀਆਂ ਤਾਂ ਕੀ
ਤਖਤੋ -ਤਾਜਾਂ ਦੀ ਸ਼ਾਮਤ ਵੀ ਆ ਜਾਂਦੀ ਹੈ
ਜਦੋਂ ਤਹਿਰੀਰ ਚੌਕ ਵਾਂਗ
ਤਹਿਰੀਕ
ਨਵੀਂ ਤਵਾਰੀਖ ਸਿਰਜਦੀ ਹੈ
ਉਦੋਂ ਇਤਿਹਾਸ ਹਾਸ਼ੀਆ ਹੋ ਜਾਂਦਾ
ਤੇ ਵਕ਼ਤ
ਵਰਤਮਾਨ ਦੇ ਖਾਲੀ ਸਫੇ ਤੇ
ਹੱਕ - ਸਚ ਦੀ ਨਵੀਂ ਇਬਾਰਤ ਲਿਖਦਾ
ਤੇ ਤੁਸਾਂ
ਇਹ ਸੱਚ ਕਰ ਵਿਖਾਇਆ
ਮਿਸ਼ਰ ਦੇ ਬਾਸ਼ਿੰਦਿਉ
ਤੁਸਾਂ ਕਰ ਵਿਖਾਇਆ ।