ਗਜ਼ਲ (ਗ਼ਜ਼ਲ )

ਆਰ ਬੀ ਸੋਹਲ   

Email: rbsohal@gmail.com
Cell: +91 95968 98840
Address: ਨਜਦੀਕ ਗੁਰਦਾਸਪੁਰ ਪਬਲਿਕ ਸਕੂਲ
ਬਹਿਰਾਮਪੁਰ ਰੋਡ ਗੁਰਦਾਸਪੁਰ India
ਆਰ ਬੀ ਸੋਹਲ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਹੁਸਨ  ਨੂੰ ਆਪਣਾ  ਖੁਦਾ  ਜਦ  ਤੋਂ  ਬਣਾਇਆ ਇਸ਼ਕ ਨੇ I
ਪਿਆਰ  ਤੋਂ  ਕੁਰਬਾਨ  ਹੋਣਾ  ਹੀ  ਸਿਖਾਇਆ  ਇਸ਼ਕ ਨੇ I
 
ਹੋਸ਼  ਵਿਚ  ਆਈਆਂ  ਨੇ  ਰੂਹਾਂ  ਭਟਕਨਾ  ਵੀ  ਮਿਟ ਗਈ,
ਨਾਦ  ਅਨਹਦ  ਦਾ  ਉਨ੍ਹਾਂ  ਨੂੰ ਜਦ  ਸੁਣਾਇਆ ਇਸ਼ਕ ਨੇ I
 
ਮਹਿਲ  ਤੇ ਵੱਡੀਆਂ  ਜਗੀਰਾਂ ਤਿਆਗ ਕੇ  ਬੁੱਧ ਬਣ  ਗਿਆ,
ਰਾਹ  ਸਿਧਾਰਥ  ਨੂੰ  ਸਚਾਈ  ਦਾ  ਵਿਖਾਇਆ  ਇਸ਼ਕ ਨੇ I
 
ਲਾ  ਲਿਆ  ਗਲ  ਨਾਲ  ਬੁੱਲਾ  ਸ਼ਾਹ  ਇਨਾਅਤ ਨੇ  ਉਦੋਂ,
ਕੰਜਰੀਆਂ  ਦੇ  ਵਾਂਗ  ਬੁੱਲਾ  ਜਦ  ਨਚਾਇਆ  ਇਸ਼ਕ ਨੇ I
 
ਬਸ਼ਰ  ਜੋ  ਮਜ਼ਲੂਮ   ਉੱਤੇ  ਜ਼ੁਲਮ   ਹੀ   ਕਰਦਾ   ਰਿਹਾ,
ਦਰਦ  ਦਾ ਅਸਿਸਾਸ  ਵੀ  ਉਸਨੂੰ  ਕਰਾਇਆ ਇਸ਼ਕ  ਨੇ I
 
ਕੌਰਵਾਂ   ਨੇ   ਵਾਰ   ਕੀਤਾ   ਜਦ   ਦਰੋਪਦ    ਨਾਰ   ਤੇ,
ਭੇਜਿਆ  ਕੇਸ਼ਵ  ਤੇ  ਇਜੱਤ   ਨੂੰ  ਬਚਾਇਆ  ਇਸ਼ਕ  ਨੇ I
 
ਉਹ   ਕਦੇ  ਬੂਟਾ  ਨਾ  ਡਰਿਆ ਝੱਖੜਾਂ   ਦੀ   ਮਾਰ   ਤੋਂ ,
ਚੀਰ  ਕੇ  ਪਰਬਤ  ਦਾ  ਸੀਨਾ ਜੋ  ਉਗਾਇਆ  ਇਸ਼ਕ ਨੇ I
 
ਇਸ਼ਕ  ਅੱਲਾ   ਇਸ਼ਕ  ਮੌਲਾ  ਸੋਹਲ  ਨੇ ਜਦ ਮਨ ਲਿਆ,
ਜਿੰਦਗੀ   ਨੂੰ   ਖੂਬਸੂਰਤ   ਹੀ   ਬਣਾਇਆ   ਇਸ਼ਕ  ਨੇ I