ਬਹੁਤ ਥਕਾਵਟ ਹੋਈ (ਕਵਿਤਾ)

ਦਿਲਜੋਧ ਸਿੰਘ   

Email: diljodh@yahoo.com
Address:
Wisconsin United States
ਦਿਲਜੋਧ ਸਿੰਘ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਨਾਂ ਉਹ ਦੂਰ ,ਨਾਂ ਹੀ ਨੇੜੇ
ਰਿਸ਼ਤਾ ਇੰਝ ਬਣਾਇਆ ,
ਵਾਂਗ ਹਵਾ ਦੇ ਛੂਹ ਕੇ ਲੰਘਿਆ
ਹਥ ਕਦੀ ਨਹੀਂ ਆਇਆ ।
 
ਫੁੱਲ ਦਾ ਬੂਟਾ ਕਿੱਥੇ ਬੀਜਾਂ
ਥਾਂ ਪਈ   ਲੱਭਾਂ ਵਿਹੜੇ ,
ਥਾਂ ਲਭਦੇ ਹੀ ਰੁੱਤ ਗਵਾਚੀ
ਹਥ ਵਿੱਚ ਹੀ  ਕੁਮਲਾਇਆ  ।
 
ਹਰੀਆਂ ਭਰੀਆਂ ਰੁੱਤਾਂ ਆਈਆਂ
ਮਹਿੱਕਾਂ ਪਿੱਛੇ ਦੌੜੀ  ,
ਮੂੰਹ ਭਾਰ  ਕੰਡਿਆਂ 'ਤੇ ਡਿੱਗੀ
ਮੂੰਹ ਮੱਥਾ ਛਿਲਵਾਇਆ ।
 
ਤੰਨ ਮੰਨ ਦੋਵੇਂ ਗੱਲ੍ਹਾਂ ਕਰਦੇ
ਕਿਸ ਬਿਰਹਨ ਲੜ ਲੱਗੇ ,
ਦੋ ਘੜੀ ਦਾ ਸੁੱਖ ਨਹੀਂ ਲੱਭਾ
ਅੱਗ ਦਾ ਜਨੰਮ ਹੰਢਾਇਆ ।
 
ਰਾਹ ਤੋਂ ਡਿੱਗੀਆਂ ਕੋੱਡੀਆਂ  ਲੱਭਾਂ                        
ਇਸ ਕੰਮੀਂ ਜ਼ਿੰਦਗੀ ਰੋਲੀ ,
ਆਪੇ ਘੱਟਾ ਮਿੱਟੀ ਉਡਾ ਕੇ
ਆਪਣੇ ਝਾਟੇ ਪਾਇਆ  ।
 
ਹਾਰ ਥੱਕ ਕੇ ਛਾਂ ਹੁਣ ਲਭਦੀ
ਵੱਲ ਅਸਮਾਨੀ  ਤਕਦੀ  ,
ਗਗਨ ਵੱਸੇ ,ਤੇਰਾ ਕਿਹੜਾ ਬੇਲੀ ,
ਬਣ ਜਾਏ ਠੰਡਾ  ਸਾਇਆ  ।