ਗਜ਼ਲ (ਗ਼ਜ਼ਲ )

ਆਰ ਬੀ ਸੋਹਲ   

Email: rbsohal@gmail.com
Cell: +91 95968 98840
Address: ਨਜਦੀਕ ਗੁਰਦਾਸਪੁਰ ਪਬਲਿਕ ਸਕੂਲ
ਬਹਿਰਾਮਪੁਰ ਰੋਡ ਗੁਰਦਾਸਪੁਰ India
ਆਰ ਬੀ ਸੋਹਲ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਹੈ  ਪਾਇਆ  ਇਸ਼ਕ   ਨੇ  ਰੁਤਬਾ   ਵਫਾਵਾਂ  ਪਾਲਦੇ  ਰਹਿਣਾ I
ਲੁਟਾਉਣਾ  ਹੁਸਨ  ਤੋਂ   ਰਿਸ਼ਮਾਂ  ਤੇ   ਆਪਾ  ਬਾਲਦੇ  ਰਹਿਣਾ I
 
ਨਵੇਂ  ਜ਼ਖਮਾਂ  ਤੇ   ਦਰਦਾਂ   ਤੋਂ   ਜੇ   ਦਿਲ  ਆਬਾਦ  ਹੋ  ਜਾਵੇ,
ਨਵਾਂ   ਖੰਜਰ   ਕੋਈ   ਇਸਨੇ   ਸਦਾ   ਹੀ   ਭਾਲਦੇ   ਰਹਿਣਾ I
 
ਮਿਟਾ   ਦੇਣੀ   ਮੇਰੀ   ਮੂਰਤ   ਤੁਸਾਂ   ਬਸ  ਰੇਤ  ਤੇ  ਵਾਹ  ਕੇ,
ਮੇਰੀ   ਸੂਰਤ  ਤੁਸਾਂ  ਦਿਲ  ਵਿਚ  ਸਦਾ  ਪਰ ਢਾਲਦੇ ਰਹਿਣਾ I
 
ਤੁਫਾਨੀ     ਨ੍ਹੇਰ    ਰਾਹਾਂ    ਤੇ    ਬਲਾਂਗਾ    ਦੀਵਿਆਂ     ਵਾਂਗੂ,
ਤੇਰੀ    ਬਸ   ਰੌਸ਼ਨੀ   ਖਾਤਰ  ਅਸਾਂ  ਦਿਲ  ਜਾਲਦੇ  ਰਹਿਣਾ I
 
ਮੇਰੀ   ਔਕਾਤ   ਵਿਚ   ਖ਼ਾਹਿਸ਼   ਭਲੇ   ਹੀ   ਗਰਕ  ਹੋ  ਜਾਵੇ,
ਮੁਸ਼ਕਤ    ਨਾਲ   ਪਰ   ਆਪਾ   ਅਸਾਂ   ਨੇ   ਘਾਲਦੇ ਰਹਿਣਾ I
 
ਤੂੰ   ਭਾਵੇਂ   ਕੈਦ   ਵਿਚ   ਰੱਖਿਆ   ਹੈ  ਮੇਰੀ   ਸੋਚ  ਦਾ  ਪੰਛੀ,
ਪਰਾਂ   ਵਿਚ ਖਿਆਲ  ਅੰਬਰਾਂ  ਦੇ  ਅਸਾਂ  ਪਰ ਪਾਲਦੇ ਰਹਿਣਾ I
 
ਕਦੇ   ਮਾਸੂਮ   ਨਜ਼ਰਾਂ  ਤੋਂ  ਵੀ  ਮਾਪੀਂ   ਦਿਲ  ਦੀ  ਗਹਿਰਾਈ,
ਸਮੁੰਦਰ   ਦਿਲ   ਦੇ   ਹਰ   ਵੇਲੇ  ਨਾ  ਤੂੰ  ਖੰਗਾਲਦੇ  ਰਹਿਣਾ I
 
ਤੂੰ ਪਿਆਸੀ  ਦਿਲ ਦੀ  ਧਰਤੀ  ਤੇ ਐ  ਸੱਜਣਾ  ਤਰਸ ਤਾਂ ਖਾਵੀਂ,
ਬਿਨਾ  ਵਰ੍ਹਿਆਂ    ਨਹੀਂ   ਚੰਗਾ   ਥਲਾਂ   ਨੂੰ   ਟਾਲਦੇ  ਰਹਿਣਾ I