ਲੱਖਾਂ ਜੀਵਾਂ ਦੀ ਤਰ੍ਹਾਂ ਜੰਮਣਾ ਸਾਡਾ,
ਵੀ ਕੋਈ ਖ਼ਾਸ ਨਹੀਂ ਸੀ ।
ਪੁੱਤ ਉਡੀਕਦੇ ਸੀ ਸਭ ,
ਸਾਡੇ ਜੰਮਣ ਦੀ ਤਾਂ ....
ਕਿਸੇ ਨੂੰ ਆਸ ਨਹੀਂ ਸੀ ।
ਦਾਈ ਕੱਪੜੇ ਵਿੱਚ ਲਪੇਟ,
ਪਾ ਦਿੱਤਾ ਸੀ ਮਾਂ ਦੇ ਕੋਲ।
ਕੁੜੀ ਜੰਮਣ ਦੇ ਮਿਹਣਿਆਂ ਤੋਂ ,
ਡਰੀ ਮਾਂ ਦੀਆਂ ਸੁਣੀਆਂ ਸਿਸਕੀਆਂ ,
ਸੁਣੇ ਨਾ ਮਾਂ ਦੇ ਮਿੱਠੇ ਬੋਲ ।
ਮੱਥਾ ਚੁੰਮ ਨਾਲ ਨੂੰ ਲਾਇਆ ਸੀ ਜਾਂ ,
ਮਾਂ ਅੱਖ ਭਰ ਮੂੰਹ ਫੇਰ ਲਿਆ ਸੀ।
ਕੁਝ ਪਤਾ ਨਹੀਂ....
ਹਿੰਮਤ ਨਹੀਂ ਸੀ ਜਾਂ ਖੁਸ਼ੀ ਨਾਲੋਂ ਵੱਧ ,
ਉਦਾਸੀ ਮਾਂ ਨੂੰ ਘੇਰ ਲਿਆ ਸੀ ।
ਡਰੀ-ਡਰੀ ਜਿਹੀ ਪਹੁੰਚੀ, ਪਿੰਡ ਦਾਦਕੇ,
ਜੀ ਖ਼ਬਰ ਮੇਰੇ ਹੋਣ ਦੀ ।
ਧੀਮੀ-ਧੀਮੀ ਆਵਾਜ਼ ਜਿਹੀ ,
ਸੁਣਾਈ ਦਿੱਤੀ ਸੀ ਗਵਾਂਢੀਆਂ ਨੂੰ,
ਤਦ ਸਾਡੇ ਘਰ ਰੋਣ ਦੀ ।
ਖ਼ੁਸ਼ -ਖ਼ੁਸ਼ ਮੈਂ ਉਸ ਦੁਨੀਆਂ ਤੋਂ ,
ਇਸ ਦੁਨੀਆਂ ਵਿੱਚ ਆਈ ਸਾਂ ।
ਕੋਈ ਖੁਸ਼ ਸੀ ਜਾ ਨਾ......
ਐਪਰ ਮੈਂ ਆਪਣੇ ਹੋਣ ਦੀ ,
ਇੱਕ ਜੰਗ ਜਿੱਤ ਆਈ ਸਾਂ ।