ਮਾਂ, ਮੈਂ ਹਾਂ ਤੇਰੀ ਜਿੰਦ ਤੇਰੀ ਜਾਨ
ਕਿਉਂ ਹੋਇਆ ਜੱਗ ਇੰਨਾ ਬੇਈਮਾਨ
ਅੌਰਤ ਤੋਂ ਬਿਨਾਂ ਸੰਸਾਰ ਦੀ ਬੇੜੀ ਨਾ ਤਰਦੀ ਏ
ਪਹਿਲਾਂ ਸੀ ਧੀ ਜੰਮ ਕੇ, ਹੁਣ ਕੁੱਖ ਚ ਪਈ ਮਰਦੀ ਏ
ਪਹਿਲਾਂ ਮੈਂ ਤੇਰੀ ਧੀ ਫਿਰ ਭਰਾ ਦੀ ਭੈਣ ਮਾਏ
ਮਾਪਿਆਂ 'ਤੇ ਬੋਝ ਨੇ ਧੀਆਂ ਲੋਕ ਇਹ ਕਿਉਂ ਕਹਿਣ ਮਾਏ
ਅਾਖੀਰ ਮਾਪਿਆਂ ਦਾ ਹੱਥ ਇਕ ਧੀ ਹੀ ਤਾਂ ਫੜ੍ਹਦੀ ਏ
ਪਹਿਲਾਂ ਸੀ ਧੀ ਜੰਮ ਕੇ, ਹੁਣ ਕੁੱਖ ਚ ਪਈ ਮਰਦੀ ਏ
ਪੜ੍ਹ ਲਿਖ ਧੀ ਕਰੇ ਕਮਾਈਆਂ
ਮਾਪਿਆਂ ਨੂੰ ਫਿਰ ਮਿਲਣ ਵਧਾਈਆਂ
ਤਾਂ ਫਿਰ ਕਿਉਂ ਦੁਨੀਆ ਧੀ ਤੋਂ ਸੜਦੀ ਏ
ਪਹਿਲਾਂ ਸੀ ਧੀ ਜੰਮ ਕੇ, ਹੁਣ ਕੁੱਖ ਚ ਪਈ ਮਰਦੀ ਏ
ਕੁੱਖ 'ਚ ਕੁੜੀ ਜਾਂ ਮੁੰਡਾ ਹੈ ਅਜਿਹਾ ਮਸ਼ੀਨਾਂ ਪਤਾ ਲਗਾ ਗਈਆਂ
ਸੰਸਾਰ ਵੇਖਣ ਤੋਂ ਪਹਿਲਾਂ ਹੀ ਪੰਜਾਬ ਦੀਆਂ ਧੀਆਂ ਖਾ ਗਈਆਂ
ਅਣ-ਜੰਮੀ ਧੀ ਚੰਦਰੀ ਦੁਨੀਆ ਤੋਂ ਨਾ ਡਰਦੀ ਏ
ਪਹਿਲਾਂ ਸੀ ਧੀ ਜੰਮ ਕੇ, ਹੁਣ ਕੁੱਖ ਚ ਪਈ ਮਰਦੀ ਏ
ਫਿਰ ਨੂੰਹ ਕਿਸੀ ਦੀ ਬਣੇ ਅਾਖੀਰ ਸੱਸ ਮਾਏ
ਧੀਆਂ ਨੂੰ ਬਚਾਉਣ ਦਾ ਕੋਈ ਰਾਹ ਦੱਸ ਮਾਏ
ਸੰਸਾਰ ਵਿੱਚ 'ਪਾਲੀ' ਵਾਂਗੂ ਕੋਈ-ਕੋਈ ਧੀ ਦਾ ਦਰਦੀ ਏ
ਪਹਿਲਾਂ ਸੀ ਧੀ ਜੰਮ ਕੇ, ਹੁਣ ਕੁੱਖ ਚ ਪਈ ਮਰਦੀ ਏ