ਚਾਹੇ ਦੁੱਖਾਂ ਵਿੱਚ ਫਸੀ ਸਾਡੀ ਜਾਨ ਹੈ ,
ਫਿਰ ਵੀ ਸਾਡੇ ਹੋਠਾਂ ਉੱਤੇ ਮੁਸਕਾਨ ਹੈ ।
ਰਹਿੰਦੇ ਹਾਂ ਚੜ੍ਹਦੀ ਕਲਾ ਦੇ ਵਿੱਚ ਹਰ ਸਮੇਂ ,
ਦੋਸਤੋ , ਸਾਡੀ ਤਾਂ ਇਹ ਹੀ ਪਹਿਚਾਨ ਹੈ ।
ਮੰਗ ਕੇ ਖਾਂਦੇ ਨੇ ਕੇਵਲ ਬੇਗੈਰਤੇ ,
ਕੰਮ ਕਰਕੇ ਖਾਣ ਵਿੱਚ ਸਾਡੀ ਸ਼ਾਨ ਹੈ ।
ਕੱਠੇ ਰਹਿ ਕੇ ਕੁਝ ਨਹੀਂ ਸਾਡਾ ਵਿਗੜਨਾ ,
ਕੱਲੇ ਕੱਲੇ ਰਹਿ ਕੇ ਹੋਣਾ ਨੁਕਸਾਨ ਹੈ ।
ਸਮਝਦੈ ਜੋ ਕਾਮਿਆਂ ਨੂੰ ਆਪਣੇ ਜਹੇ ,
ਉਹ ਉਨ੍ਹਾਂ ਨੂੰ ਲੱਗਦਾ ਅੱਛਾ ਇਨਸਾਨ ਹੈ ।
ਲੋਕ ਉਸ ਅਫ਼ਸਰ ਦਾ ਕਰਦੇ ਸਤਿਕਾਰ ਨੇ ,
ਜਿਸ ਨੂੰ ਦਫ਼ਤਰ ਵਿੱਚ ਮਿਲਣਾ ਆਸਾਨ ਹੈ ।
ਪੜ੍ਹਦੇ ਨੇ ਉਹ ਸ਼ੌਕ ਨਾ’ ਉਸ ਦੇ ਸ਼ਿਅਰਾਂ ਨੂੰ ,
ਪਾਠਕਾਂ ਨੂੰ ਜਿਹੜਾ ਸ਼ਾਇਰ ਪਰਵਾਨ ਹੈ ।