ਕਿਸੇ ਦੀ ਚੁੱਪ ਦਾ ਲਾਭ ਉਠਾਉਂਣਾ ਚੰਗਾ ਨਹੀਂ।
ਸੱਥ ਵਿਚ ਜਾ ਕੇ ਸ਼ੋਰ ਮਚਾਉਂਣਾ ਚੰਗਾ ਨਹੀਂ।
ਸਾਰੀ ਹਕੀਕਤ ਦਾ ਪਤਾ ਹੁੰਦਾ ਭਾਈਚਾਰੇ ਨੂੰ,
ਕੁਝ ਵੀ ਉਹਨਾਂ ਕੋਲੋਂ ਛਪਾਉਣਾ ਚੰਗਾ ਨਹੀਂ।
ਘਰ ਦੀ ਗੱਲ ਦਾ ਹੱਲ ਘਰੇ ਬੈਠ ਕੱਢ ਲਵੋ,
ਸ਼ੱਕ ਦੀ ਵਿਨ੍ਹਾ ਤੇ ਬਾਤ ਵਧਾਉਣਾ ਚੰਗਾ ਨਹੀ
ਝੱਗਾ ਚੁੱਕਿਆਂ ਢਿੱਡ ਆਪਣਾ ਹੀ ਨੰਗਾ ਹੁੰਦਾ ਹੈ।
ਇਹ ਤਮਾਸ਼ਾ ਜੱਗ ਨੂੰ ਵਿਖਾਉਣਾ ਚੰਗਾ ਨਹੀਂ।
ਨਾਂ ਚਹੁੰਦਿਆਂ ਵੀ ਝੂਠ ਤੋਂ ਪਰਦਾ ਉੱਠ ਜਾਂਦਾ,
ਸੱਚ ਤੇ ਝੂਠ ਦਾ ਬੁਰਕਾ ਪਾਉਣਾ ਚੰਗਾ ਨਹੀਂ।
ਜੇ ਅਣਜਾਣੇ ਚ ਕਿਧਰੇ ਗਲਤੀ ਹੈ ਹੋ ਜਾਦੀ,
ਉਸ ਗਲਤੀ ਨੂੰ ਕਦੇ ਲੁਕਾਉਣ ਚੰਗਾ ਨਹੀਂ।
ਰਿਸ਼ਤੇ ਨਾਤੇ ਹੁੰਦੇ ਨੇ ਸਿੱਧੂ ਕੱਚ ਦੀਆਂ ਵੰਗਾਂ,
ਕੱਚ ਦੇ ਉਪਰ ਠੋਕਰ ਲਾਉਣਾ ਚੰਗਾ ਨਹੀਂ।