ਹੋ ਜਾਣੀ ਅੱਜ ਬੱਲੇ-ਬੱਲੇ !
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਭਰਿਆ ਭਰਿਆ ਹੋਣਾ ਮੇਲਾ।
ਜੇਬਾਂ ਵਿੱਚ ਹੋਊ ਪੈਸਾ-ਧੇਲਾ।
ਖਾਵਾਂ-ਪੀਵਾਂਗੇ ਕੱਲੇ-ਕੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਰਾਵਣ ਹੁਰਾਂ ਦੇ ਬੁੱਤ ਹੋਣਗੇ।
ਹੰਕਾਰਾਂ ਦੇ ਵਿੱਚ ਧੁੱਤ ਹੋਣਗੇ।
ਅੱਗ ਲਾ ਸੁੱਟਣੇ ਥੱਲੇ-ਥੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਨੇਕੀ ਦੀ ਤਾਂ ਜਿੱਤ ਹੀ ਹੁੰਦੀ।
ਬਦੀ ਤਾਂ ਇੱਕ ਦਿਨ ਚਿੱਤ ਹੀ ਹੁੰਦੀ।
ਝੂਠ ਦੀ ਵਾਹ ਨਾ ਚੱਲੇ ਚੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਚੀਜ਼ਾਂ ਦੇ ਨਾਲ ਭਰਿਆ ਮੇਲਾ
ਹੁੰਦਾ ਸਿਖਰੀਂ ਚੜਿਆ ਮੇਲਾ।
ਫਿਰਦੇ ਬੱਚੇ ਕੱਲ-ਮੁਕੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਨਾ ਤਾਂ ਠੰਡ ਨਾ ਗਰਮੀ ਹੁੰਦੀ।
ਮੌਸਮ ਦੇ ਵਿੱਚ ਨਰਮੀ ਹੁੰਦੀ।
ਮੇਲਾ ਸਾਰਾ ਦਿਨ ਹੀ ਚੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਤਰ੍ਹਾਂ ਤਰ੍ਹਾਂ ਦੇ ਰੂਪ ਵਟਾਈ।
ਰਾਮ ਲੱਖਣ ਕਈ ਬਣਦੇ ਭਾਈ।
ਜੈ ਸ੍ਰੀ ਰਾਮ ਦਾ ਨਾਹਰਾ ਚੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਬੱਚਿਆਂ ਦੇ ਲਈ ਗਦਾ-ਕਟਾਰਾਂ।
ਮੇਲੇ ਦੇ ਵਿੱਚ ਸ਼ੈਆਂ ਹਜਾਰਾ।
ਵਿਕਦੇ ਵੰਗਾ ਛਾਪਾਂ-ਛੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਸ਼ਾਮੀ ਬੁੱਤਾਂ ਫੁਕ ਜਾਣਾ ਹੈ।
ਅਸੀਂ ਵੀ ਵਾਪਸ ਘਰ ਆਣਾ ਹੈ।
ਸੁਬਹ ਸੀ ਘਰਦਿਆਂ ਘੱਲੇ-ਘੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !
ਹੁਣ ਤਾਂ ਪਿੰਡ ਬਹੋਨੇ ਲੱਗਦਾ।
ਲੜੀਆਂ ਵਾਂਗ ਦੁਸਹਿਰਾ ਜਗਦਾ।
ਮੇਰੇ ਪਿੰਡ ਦੀ ਬੱਲੇ-ਬੱਲੇ -
ਅਸੀਂ ਦੁਸਹਿਰਾ ਵੇਖਣ ਚੱਲੇ !