ਮੇਰੇ ਮਿੱਤਰਾ ਮੇਰੇ ਯਾਰਾ
(ਗੀਤ )
ਮੇਰੇ ਮਿੱਤਰਾ ਮੇਰੇ ਯਾਰਾ
ਹੁਣ ਤਾਂ ਕਿੰਨੇ ਚਿਰ ਤੋਂ ਆੜੀ
ਤੇਰਾ ਕਦੇ ਵੀ ਖਤ ਨਹੀਂ ਆਇਆ।
ਕਦੇ ਤੂੰ ਪਿੰਡ ਦਾ ਹਾਲ ਨਹੀਂ ਦੱਸਿਆ
ਖੁੰਢ ਚਰਚਾ ਦੀ ਗੱਲ ਨਾ ਕੀਤੀ
ਰਾਜਨੀਤੀ ਵੀ ਗੰਧਲੀ ਹੋ ਗਈ
ਸਭ ਨੂੰ ਦਿਸਦੀ ਹੁਣ ਹੈ ਮਾਇਆ।
ਮੇਰੇ ਮਿੱਤਰਾ==
ਤੀਆਂ ਵਾਲੇ ਛੱਪੜ ਦੀ ਥਾਂ
ਸੁਣਿਐਂ ਹੁਣ ਦੁਮੰਜਲੀ ਕੋਠੀ
ਪੇਕੀਂ ਆਈਆਂ ਧੀਆਂ ਭੈਣਾ
ਨਾ ਗਿੱਧਾ ਨਾ ਗੀਤ ਕੋਈ ਗਾਇਆ।
ਮੇਰੇ ਮਿੱਤਰਾ
ਤੇਰੇ ਤਾਏ ਸ਼ਰਾਬੀ ਕੋਲੋਂ
ਘਰ ਦੀ ਕੱਢੀ ਪੀ ਕੇ ਸੀ ਜਦ
ਪਿੰਡ ਦੇ ਵਿੱਚ ਸੀ ਕਤਲ ਹੋ ਗਿਆ
ਸੁਣਿਐਂ ਅਜੇ ਵੀ ਜੇਲ੍ਹ ਭੁਗਤਦਾ
ਵਰ੍ਹਿਆਂ ਤੋਂ Àਹ ਘਰ ਨਹੀਂ ਆਇਆ।
ਮੇਰੇ ਮਿੱਤਰਾ
ਮੁੰਡੇ ਖੁੰਡੇ ਵਿਗੜ ਗਏ ਨੇ
ਨਸ਼ਿਆਂ ਦੇ ਦਰਿਆ ਵਿਚ ਵਹਿ ਗਏ
ਖੇਤੀ ਕੰਮਾਂ ਕਾਰਾਂ ਦੇ ਵਿਚ
ਭਈਆਂ ਨੇ ਹੈ ਗਲਬਾ ਪਾਇਆ।
ਮੇਰੇ ਮਿੱਤਰਾ
ਧੀਆਂ ਭੈਣਾਂ ਨਹੀ ਸੁਰੱਖਿਅਤ
ਪਿੰਡ ਵਿਚ ਲੋਕ ਲਾਜ ਨਾ ਕੋਈ
ਦਿਨ ਦਿਹਾੜੇ ਗੁੰਡਾਗਰਦੀ
ਕਿੰਨਾ ਮਾੜਾ ਵੇਲਾ ਆਇਆ।
ਮੇਰੇ ਮਿੱਤਰਾ
ਹੁਣ ਤਾਂ ਸੁਣਿਐਂ ਥਾਂ ਥਾਂ ਯਾਰਾ
ਚੋਰ ਉਚੱਕੇ ਗੁੰਡੀ ਰੰਨ ਪ੍ਰਧਾਨ ਬਣੀ ਹੈ
ਵਿਕਾਸ ਨਾਂ ਦੀ ਚੀਜ਼ ਨਾ ਕੋਈ
ਵਿਨਾਸ਼ ਨੇ ਹਰ ਥਾਂ ਡੇਰਾ ਲਾਇਆ।
ਮੇਰੇ ਮਿੱਤਰਾ
ਚੌਰਾਸੀ ਦੇ ਦੰਗਿਆਂ ਵੇਲੇ
ਗੁੰਮ ਗਏ ਮਾਸੂਮ ਸੀ ਕਿੰਨੇ
ਅਣਪਛਾਤੀਆਂ ਲਾਸ਼ਾਂ ਬਣ ਗਏ
ਕਿੰਨੇ ਸਾਲ ਬੀਤ ਗਏ ਯਾਰਾ
ਉਹਨਾਂ ਦਾ ਕੋਈ ਪਤਾ ਨਹੀਂ ਆਇਆ।
ਮੇਰੇ ਮਿੱਤਰਾ
ਤਾਹੀਂਉਂ ਮਿੱਤਰਾ ਵਿਚ ਵਿਦੇਸ਼ਾਂ ਮੈਂ ਰੁਲਦਾ ਹਾਂ
ਬੜਾ ਹੇਰਵਾ ਪਿੰਡ ਦੀ ਜੂਹ ਦਾ
ਪਿੰਡ ਦੀਆਂ ਗਲੀਆਂ ਯਾਦ ਅਉਂਦੀਆਂ
ਕਿੰਨਾ ਮੈਂ ਨਿਰਮੋਹ ਹੋ ਗਿਆ
ਖੋਲਾ ਬਣਿਆ ਘਰ ਜੋ ਮੇਰਾ
ਦੇਖਣ ਲਈ ਨਾ ਫੇਰਾ ਪਾਇਆ।
ਮੇਰੇ ਮਿੱਤਰਾ ਮੇਰੇ ਯਾਰਾ