ਰਮੇਸ਼ ਕੁਮਾਰ ਤੇ ਮਿਸ ਸੁਮਨ ਨੇ ਇੱਕੋ ਕਾਲਿਜ, ਇੱਕੋ ਹੀ ਜਮਾਤ ਵਿੱਚ ਜਦੋਂ ਦਾ ਦਾਖਲਾ ਲਿਆ ਸੀ ਉਸ ਦਿਨ ਤੋਂ ਹੀ ਉਹ ਇੱਕ ਦੂਜੇ ਦੇ ਨੇੜੇ-ਨੇੜੇ ਆਉਣ ਲੱਗ ਪਏ। ਹੌਲੀ-ਹੌਲੀ ਉਨ੍ਹਾਂ ਦਾ ਪਿਆਰ ਇੰਨਾ ਵਧ ਗਿਆ ਕਿ ਸੁਮਨ, ਰਮੇਸ਼ ਦੀ ਸਾਹਿਬਾਂ ਤੇ ਰਮੇਸ਼ ਸੁਮਨ ਦਾ ਮਿਰਜਾ ਬਣ ਕੇ ਰਹਿਣ ਦੀਆਂ ਕਸਮਾਂ ਪਾ ਚੁੱਕੇ ਸਨ ਮਿਰਜਾ-ਸਾਹਿਬਾਂ ਦੀ ਰੀਸ ਕਰਦਿਆਂ ਦੋਵੇਂ ਇੱਕ ਦੂਜੇ ਨੂੰ ਕੁਝ ਜ਼ਿਆਦਾ ਹੀ ਚਾਹੁਣ ਲੱਗ ਪਏ ਸਨ। ਇਹ ਅੱਜ ਦੇ ਸਮੇਂ ਦੇ ਮਿਰਜਾ ਸਾਹਿਬਾਂ ਭਾਵੇਂ ਵੱਖ-ਵੱਖ ਦੂਰ-ਦੂਰ ਪਿੰਡਾਂ ਦੇ ਰਹਿਣ ਵਾਲੇ ਸਨ ਪਰ ਮਿਰਜਾ ਇੱਕ ਦੋ ਵਾਰ ਆਪਣੀ ਸਾਹਿਬਾਂ ਨੂੰ ਮੋਟਰ ਸਾਈਕਲ ਤੇ ਬਿਠਾ ਕੇ ਝੂਟੇ ਦਿਵਾ ਲਿਆਇਆ ਸੀ। ਪੇਪਰ ਹੋ ਜਾਣ ਤੇ ਡੇਢ ਕੁ ਮਹੀਨੇ ਦੀਆਂ ਕਾਲਿਜ ਚੋਂ ਛੁੱਟੀਆਂ ਹੋ ਗਈਆਂ ਦੋਵਾਂ ਦਾ ਆਪਸੀ ਮਿਲਣਾ ਬੜਾ ਮੁਸ਼ਕਲ ਹੋ ਗਿਆ। ਮਿਰਜੇ ਨੇ ਸਾਹਿਬਾਂ ਨੂੰ ਭਾਵੇਂ ਮੋਬਾਇਲ ਫੋਨ ਤੇ ਮਿਲਣ ਲਈ ਕਾਫੀ ਵਾਰ ਜ਼ੋਰਦਾਰ ਸੁਨੇਹਾ ਦਿੱਤਾ ਪ੍ਰੰਤੂ ਸਾਹਿਬਾਂ ਜੋ ਮਾਪਿਆਂ, ਭੈਣ-ਭਰਾਵਾਂ ਦੀ ਜ਼ੰਜੀਰ ਵਿੱਚ ਚੁਫੇਰਿਓ ਭਾਰਤ-ਪਾਕਿ ਦੇ ਬਾਰਡਰ ਵਾਂਗ ਸੀਲ ਸੀ ਤੇ ਉਸਨੇ ਅੱਗੋਂ ਕੋਈ ਖਾਸ ਹੁੰਗਾਰਾ ਨਾ ਭਰਿਆ ਇੱਕ ਦਿਨ ਫੋਨ ਰਾਹੀਂ ਮਿਰਜੇ ਨੇ ਸਾਹਿਬਾਂ ਤੇ ਭਾਰੀ ਗਿਲਾ-ਸ਼ਿਕਵਾ ਕਰਦਿਆ ਕਿਹਾ, ਕਿ ਮੇਰੀਏ ਸਾਹਿਬਾਂ ਮੈਂ ਤੇਰੇ ਲਈ ਅੰਬਰੋਂ ਤਾਰੇ ਤੋੜ ਕੇ ਲਿਆਉਣ ਲਈ ਤਿਆਰ ਹਾਂ। ਪਰਸੋਂ ਮੈਂ ਸ਼ਹਿਰ ਗਿਆ ਸੀ ਤੇ ਤੇਰੇ ਪਿਆਰ ਵਿੱਚ ਪਗਲੇ ਹੋਏ ਨੇ ਕੰਨੀਂ ਮੁੰਦਰਾਂ ਵੀ ਪਵਾ ਲਿਆਂਦੀਆਂ ਨੇ , ਆਪਣੀ ਖੱਬੀ ਬਾਂਹ ਦੇ ਡੌਲੇ ਤੇ ਟੈਟੂ ਖੁਦਵਾ ਕੇ ਲਿਆਇਆ ਹਾਂ। ਟੈਟੂ ਦੇ ਵਿਚਕਾਰ ਤੇਰਾ ਨਾਮ ਲਿਖਵਾ ਦਿੱਤਾ ਐ, ਤੇ ਟੈਟੂ ਨੂੰ ਮੈਂ ਵਾਰ-ਵਾਰ ਚੁੰਮ ਕੇ ਤੇਰੀਆਂ ਯਾਦਾਂ ਤਾਜ਼ੀਆਂ ਕਰਦਾ ਨਹੀਂ ਥੱਕਦਾ, ਤੇ ਤੂੰ…ਤੇ ਤੂੰ, ਸਿਰਫ ਤੇ ਸਿਰਫ ਮਤਲਬ ਤੱਕ ਹੀ ਸੀਮਤ ਰਹੀ ਕਦੇ ਮੈਥੋਂ ਸੋਨੇ ਦੀ ਤਵੀਤੀ, ਕਦੇ ਝਾਂਜਰਾਂ, ਕਦੇ-ਕੁਝ ਤੇ ਕਦੇ ਕੁਝ, ਹੁਣ ਚੰਗੀ ਤਰ੍ਹਾਂ ਫੋਨ ਵੀ ਨਹੀ ਸੁਣਦੀ, ਪੂਰੀ ਗੱਲ ਨਹੀਂ ਕਰਦੀ, ਮਿਲਣ ਦਾ ਟਾਈਮ ਨਹੀਂ ਤੇਰੇ ਕੋਲ, ਤੇਰੇ ਗਮਾਂ ਚ ਮੈਂ, ਸ਼ਰਾਬ, ਭੁੱਕੀ, ਡੋਡੇ ਤੋਂ ਇਲਾਵਾ ਹਰ ਪ੍ਰਕਾਰ ਦੀ ਨਸ਼ੀਲੀ ਡਰੱਗ ਦੀ ਯੋਗ ਵਰਤੋ ਨੂੰ ਅਪਣਾ ਲਿਆ ਹੈ ਦੋ ਏਕੜ ਜ਼ਮੀਨ ਵੀ ਹੁਣ ਤੱਕ ਤੇਰੀ ਭੇਟ ਚੜ ਚੁੱਕੀ ਐ…
ਵੇਖ, ਸੁਣ ਮਿਰਜ਼ਿਆ ਜਿਹੜੇ ਤੂੰ ਮੈਨੂੰ ਤਾਰੇ ਤੋੜ ਕੇ ਲਿਆਉਣ ਦੀ ਗੱਲ ਕਰਦੈਂ, ਵੇਖੀ ਐਵੇਂ ਐਨਾ ਕਮਲਾ ਨਾ ਬਣੀਂ, ਤਾਰੇ ਤੋੜਨ ਲੱਗੇ ਦੀ ਜੇ ਕਿਸੇ ਨੇ ਹੇਠੋਂ ਪੌੜੀ ਖਿੱਚ ਦਿੱਤੀ ਤਾਂ ਕੋਈ ਲੱਤ ਬਾਂਹ ਤੁੜਵਾ ਬੈਠੇਗਾ ਜਾਂ ਫਿਰ ਜਹਾਨੋਂ ਜਮਾਂ ਈ ਕੂਚ ਕਰ ਜਾਵੇਗਾ। ਤੂੰ ਤਾਂ ਕਹਿੰਦਾ ਸੀ ਕਿ ਮੈਂ ਕਿਸੇ ਨਸ਼ੇ ਦੇ ਨੇੜ ਨਹੀਂ ਜਾਂਦਾ, ਹੁਣ ਕਿੰਨੇ ਨਸ਼ੇ ਲਾਈ ਫਿਰਦੈਂ ਨਾਲੇ ਤੂੰ ਜਿਹੜਾ ਬਾਂਹ ਤੇ ਟੈਟੂ ਖੁਣਵਾ ਕੇ ਲਿਆਇਆ ਐ, ਬਹੁਤ ਮਾੜਾ ਕੀਤੈ, ਕਿਉਕਿ ਟੈਟੂ ਨਾਲ ਸਰੀਰ ਵਿੱਚ ਟੀ.ਬੀ. , ਏਡਜ਼ ਤੇ ਹੋਰ ਭਿਆਨਕ ਬਿਮਾਰੀਆ ਚਿੰਬੜ ਜਾਂਦੀਆਂ ਹਨ ਨਾਲੇ ਫੌਜ਼ ਵਾਲੇ ਭਰਤੀ ਕਰਨ ਤੋਂ ਵੀ ਇਨਕਾਰੀ ਕਰ ਦਿੰਦੇ ਹਨ। ਹੁਣ ਮੇਰੀ ਬਹੁਤ ਵੱਡੀ ਮਜ਼ਬੂਰੀ ਐ, ਮੇਰੇ ਭਾਈ ਤਾਂ ਨਿਰੇ ਅੱਗ ਦੀਆਂ ਨਾਲਾਂ ਨੇ , ਆਪਾਂ ਦੋਵੇਂ ਨੂੰ ਕੱਚਿਆ ਨੂੰ ਹੀ ਖਾ ਜਾਣਗੇ ਅੱਗੇ ਤੋ ਮੇਰੇ ਵੱਲੋਂ ਤੈਨੂੰ ਅਲਵਿਦਾ , ਸਤਿ ਸ੍ਰੀ ਅਕਾਲ।
ਮੈਂ ਖਿਆ ਸਾਹਿਬਾਂ ਜੀ ਤੁਸੀਂ ਪ੍ਰਵਾਹ ਕਿਹੜੀ ਗੱਲ ਦੀ ਕਰਦੇ ਓ, ਜਦੋਂ ਲਟਰਮ-ਪਟਰਮ ਨਾਲ ਆਪਣਾ ਕਾਰਡ ਚਾਰਜ ਕੀਤਾ ਹੋਇਆ ਨਾ, ਫਿਰ ਤੇਰੇ ਭਾਈ ਤਾਂ ਕੀ, ਸਾਰੇ ਪਿੰਡ ਨੂੰ ਹੀ ਮੂਹਰੇ ਲਾ ਦੇਊਗਾ, ਤੇ ਜੇ ਤੇਰੀ ਆਹ ਹੀ ਸੋਚ ਐ, ਤਾਂ ਅੱਜ ਰਾਤੀਂ ਖੜਕੂ ਤੇਰੀ ਗਲੀ ਚ ਤੇਰੇ ਮਿਰਜ਼ੇ ਦਾ ਯਾਮਾਂ……………………………………..
ਮਿਰਜ਼ਾ ਵਾਕਿਆਂ ਹੀ ਅੱਧੀ ਰਾਤੋਂ ਆਪਣੀ ਸਾਹਿਬਾਂ ਦੀ ਗਲੀ ਚ ਯਾਮਾਂ ਲੈ ਆ ਵੜਿਆ, ਤੇ ਜਿਉਂ ਹੀ ਉਸਨੇ ਕੰਧ ਟੱਪ ਸਾਹਿਬਾਂ ਦੇ ਵਿਹੜੇ ਵਿੱਚ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ ਤਾਂ ਫਿਰ ਉਹੀ ਗੱਲ ਹੋਈ ਜਿਹੜੀ ਗੱਲੋਂ ਸਾਹਿਬਾਂ ਨੇ ਆਪਣੇ ਮਿਰਜੇ ਨੂੰ ਵਰਜਿਆ ਸੀ ਸਾਹਿਬਾਂ ਦੇ ਭਾਈਆਂ ਨੇ ਜਿਉਂ ਹੀ ਪੜਦੈੰ ਪੜਦੈਂ ਕਰਕੇ ਅਸਮਾਨੀ ਗੋਲੀਆਂ ਚਲਾਈਆਂ, ਤਾਂ ਮਿਰਜ਼ੇ ਨੂੰ ਆਪਣੀ ਬੱਕੀ (ਯਾਮਾ) ਦਿਸਣੋਂ ਹਟ ਗਈ ਤੇ ਖਾਧੀ ਪੀਤੀ ਕਿਧਰੇ ਉੱਡ ਗਈ। ਪਰ ਚੰਗੀ ਕਿਸਮਤ ਉਹ ਬਚ ਨਿਕਲਿਆਂ
ਮੂਹਰੇ-ਮੂਹਰੇ ਮਿਰਜ਼ਾ ਤੇ ਪਿੱਛੇ-ਪਿੱਛੇ ਸਾਹਿਬਾਂ ਦੇ ਭਾਈ….., ਉਸਨੂੰ ੧੫-੨੦ ਕਿਲੋਮੀਟਰ ਤੱਕ ਅੱਗੇ-ਅੱਗੇ ਭਜਾਈ ਗਏ ਪਰ ਮਿਰਜ਼ਾ ਇੱਕ ਚੁਰਾਸਤੇ 'ਚ ਝੁਕਾਨੀ ਤਾਂ ਉਨ੍ਹਾਂ ਨੂੰ ਦੇ ਗਿਆ ਪ੍ਰੰਤੂ ਫਿਰ ਵੀ ਬੱਕੀ ਤੇ ਬੈਠੇ ਨੂੰ ਦਰੱਖਤਾਂ ਦੇ ਪਛੜਾਵੇਂ ਵੀ ਸਾਹਿਬਾਂ ਦੇ ਭਾਈ ਹੀ ਜਾਪ ਰਹੇ ਸਨ ਡਰਿਆ ਮਿਰਜ਼ਾ ਅੱਗੇ ਆ ਰਹੇ ਕਿਸੇ ਤੇਜ਼ ਰਫਤਾਰ ਵਾਹਨ ਨਾਲ ਇੱਕ ਸੜਕ ਦੁਰਘਟਨਾ ਦਾ ਬੁਰੀ ਤਰ੍ਹਾਂ ਸ਼ਿਕਾਰ ਹੋ ਗਿਆ, ੧੦੮ ਐਂਬੂਲੈਂਸ ਨੇ ਬੇਹੋਸ਼ੀ ਦੀ ਹਾਲਤ 'ਚ ਉਸਨੂੰ ਕਿਸੇ ਅਜਨਬੀ ਰਾਹਗੀਰ ਨੇ ਜ਼ੇਰੇ ਇਲਾਜ ਅਧੀਨ ਸਰਕਾਰੀ ਹਸਪਤਾਲ ਵਿਖੇ ਭਰਤੀ ਕਰਵਾਇਆ।
ਪਿੱਛੋਂ ਮਿਰਜ਼ੇ ਦੀ ਸਾਹਿਬਾਂ ਨੂੰ ਕੋਈ ਜ਼ਿਆਦਾ ਚਿੰਤਾ ਮਹਿਸੂਸ ਨਹੀਂ ਸੀ ਹੋਈ।
ਠੀਕ ਤਿੰਨ ਚਾਰ ਦਿਨ ਬਾਅਦ ਮਾੜਾ-ਮੋਟਾ ਠੀਕ ਹੋਣ ਤੇ ਮਿਰਜ਼ੇ ਨੇ ਆਪਣੀ ਸਾਹਿਬਾਂ ਨੂੰ ਕਈ ਵਾਰ ਫੋਨ ਮਿਲਾਇਆ, ਪਹਿਲਾਂ ਤਾਂ ਸਾਹਿਬਾਂ ਨੇ ਫੋਨ ਸੁਣਨਾ ਉੱਕਾ ਹੀ ਉਚਿੱਤ ਨਾ ਸਮਝਿਆ ਪ੍ਰੰਤੂ ਮਜ਼ਬੂਰ ਹੁੰਦਿਆਂ ਇੱਕ ਵਾਰ ਫੋਨ ਸੁਣਨ ਦਾ ਮਨ ਬਣਾ ਹੀ ਲਿਆ
ਹੈਲੋ! ਸਾਹਿਬਾਂ..
ਹਾਂ.ਮਿਰਜਿਆ
ਮੇਰਾ ਐਕਸੀਡੈਂਟ ਹੋ ਗਿਆ ਸੀ ਤੇ ਮੈਂ ਫਲਾਣੇ ਸ਼ਹਿਰ ਦੇ ਹਸਪਤਾਲ ਚ ਦਾਖਲ ਹਾਂ, ਉਸ ਦਿਨ ਤੇਰੇ ਭਰਾਵਾਂ ਹੱਥੋਂ ਤਾਂ ਬਚ ਨਿਕਲਿਆ, ਪ੍ਰੰਤੂ ਅੱਗੇ ਇੱਕ ਤੇਜ਼ ਰਫਤਾਰ ਟਰੱਕ ਨੇ ਮੈਨੂੰ ਆਪਣੀ ਲਪੇਟੇ ਚ ਲੈ ਲਿਆ ਸੀ ਜਿਸ ਕਾਰਨ ਉਸ ਦੀ ਬਾਂਹ ਕੱਟੀ ਗਈ ਹੈ
ਮਿਰਜ਼ਿਆ ਕਿਹੜੀ ਬਾਂਹ ਕੱਟੀ ਗਈ…?
ਖੱਬੀ…
ਕਿੱਥੋਂ ਕੁ…?
ਬੱਸ ਕੂਹਣੀ ਤੋਂ ਥੋੜੀ ਜਿਹੀ ਉਪਰੋਂ……
ਹਾਏ…ਹਾਏ ਵੇ ਮਿਰਜ਼ਿਆ… ਮੈਂ ਮਰ ਜਾਂਵਾ…… ਊਂ ਟੈਟੂ ਬਚ ਗਿਐ……………………….?
ਹਾਂ ਟੈਟੂ ਦੇ ਬਿਲਕੁਲ ਨਾਲੋਂ……
ਸ਼ੁਕਰ ਐ…ਸ਼ੁਕਰ ਐ… ਸ਼ੁਕਰ ਕਰ, ਮਿਰਜ਼ਿਆ ਜੇ ਮਾੜੀ –ਮੋਟੀ ਵੀ ਉਪਰੋਂ ਹੋਰ ਬਾਂਹ ਕੱਟੀ ਜਾਂਦੀ ਤਾਂ ਫਿਰ ਟੈਟੂ ਦਾ ਕੀ ਬਣਦਾ ।