ਅਣਪਛਾਤੇ ਸਰਗਰਮ ਚੋਰ ਗ੍ਰੌਹ ਵੱਲੋਂ ਕਿਸਾਨਾਂ ਦੇ ਖੇਤਾਂ ਚ ਲੱਗੇ ਬਿਜਲੀ ਦੇ ਟਰਾਂਸਫਾਰਮਰਾਂ ਚੋਂ ਕੀਮਤੀ ਸਮਾਨ ਕੱਢਣ, ਮੋਟਰਾਂ ਦੀਆਂ ਤਾਰਾਂ ਚੋਰੀ ਕਰਕੇ ਲਿਜਾਣ ਦੀਆਂ ਘਟਨਾਵਾਂ ਦਾ ਸਿਲਸਿਲਾ ਪਿਛਲੇ ਕਾਫੀ ਲੰਮੇ ਸਮੇਂ ਤੋਂ ਚੱਲਿਆ ਆ ਰਿਹਾ ਸੀ ਪੁਲੀਸ ਪ੍ਰਸ਼ਾਸਨ ਇਸ ਪ੍ਰਤੀ ਭਾਵੇਂ ਨਜ਼ਰਸਾਨੀ ਕਰ ਰਿਹਾ ਸੀ ਪ੍ਰੰਤੂ ਉਨ੍ਹਾਂ ਦੇ ਕੋਈ ਅੜਿੱਕੇ ਨਹੀਂ ਸੀ ਆਇਆ।
ਆਖਰ ਇੱਕ ਰਾਤ ਕਿਸਾਨਾਂ ਨੇ ਰਾਖੀ ਦੌਰਾਨ ਆਪਣੀ ਹਿੰਮਤ ਨਾਲ ਚੋਰੀ ਕਰਦੇ ਇੱਕ ਚੋਰ ਨੂੰ ਮੌਕੇ ਤੇ ਦਬੋਚ ਲਿਆ ਤੇ ਉਸਦੇ ਬਾਕੀ ਸਾਥੀ ਫਰਾਰ ਹੋ ਗਏ। ਫੜ੍ਹੇ ਚੋਰ ਦੀ ਕੁੱਝ ਕੁੱਟਮਾਰ ਕਰਨ ਉਪਰੰਤ ਕਿਸਾਨਾਂ ਨੇ ਚੋਰ ਪੁਲੀਸ ਦੇ ਹਵਾਲੇ ਕਰ ਦਿੱਤਾ। ਕਿਸਾਨ ਖੁਸ਼ ਸਨ ਕਿ ਹੁਣ ਉਨ੍ਹਾਂ ਦੀਆਂ ਪਿਛਲੀਆਂ ਚੋਰੀਆਂ ਬਾਰੇ ਵੀ ਪਤਾ ਚੱਲ ਜਾਵੇਗਾ।
ਥਾਣੇ 'ਚ ਬੰਦ ਚੋਰ ਨੂੰ ਪੁਲੀਸ ਕਰਮਚਾਰੀਆਂ ਵੱਲੋਂ ਤੌਣੀਂ ਲਗਾਈ ਜਾ ਰਹੀ ਸੀ ਥਾਣੇਦਾਰ ਇੱਕ ਪਾਸੇ ਖੜ੍ਹਾ ਸੀ ਤਿੰਨ-ਚਾਰ ਪੁਲਿਸੀਆਂ ਨੇ ਚੋਰ ਨੂੰ ਲੱਤਾਂ-ਬਾਹਾਂ ਤੋਂ ਦੱਬਿਆ ਹੋਇਆ ਸੀ ਤੇ ਚੱਲ ਰਹੇ ਪਟਾ_ਪ੍ਰੇਡ ਦੌਰਾਨ ਚਾਂਗਰਾ ਮਾਰਦਾ ਹੋਇਆ ਚੋਰ ਸਭ ਚੋਰੀਆਂ ਮੰਨਦਾ ਹੋਇਆ ਕਹਿ ਰਿਹਾ ਸੀ ਕਿ ਸਰਦਾਰ ਜੀ ਅਸੀਂ ਐਨੇ ਸਾਥੀ ਹਾਂ, ਫਲਾਣੇ-ਫਲਾਣੇ ਪਿੰਡਾਂ ਦੇ ਖੇਤਾਂ ਚੋਂ ਐਨੀਆਂ ਚੋਰੀਆਂ ਕੀਤੀਆਂ ਹਨ।
ਥਾਣੇਦਾਰ ਅੱਗੋਂ ਕਹਿ ਰਿਹਾ ਸੀ, ਕਿ ਅਸਲੀ ਗੱਲ ਦੱਸ, ਅਸਲੀ ਗੱਲ…ਅਸੀਂ ਤੇਰੇ ਸਾਥੀ ਜਾਂ ਕਿਸਾਨਾਂ ਤੋਂ ਕੀ ਲੈਣਾਂ ਐ…। ਚਲਦੇ ਹੋਏ ਪਟੇ ਦੌਰਾਨ ਚੋਰ ਫਿਰ ਕਹਿ ਰਿਹਾ ਸੀ ਕਿ ਸਰਦਾਰ ਜੀ ਮੈਂ ਕੋਈ ਵੀ ਲੁਕੋ ਨਹੀਂ ਰੱਖਿਆ ਸਭ ਸੱਚ ਬੋਲ ਦਿੱਤਾ ਹੈ ਮੈਨੂੰ ਬਖਸ਼ ਦੇਵੋ। ਪਰ ਤੌਣੀ ਪੂਰੀ ਸਰਗਰਮੀ ਨਾਲ ਚੱਲ ਰਹੀ ਸੀ ਏਨੇ ਨੂੰ ਥਾਣੇਦਾਰ ਨੁੰ ਫੋਨ ਆਇਆ ਤੇ ਉਹ ਜ਼ਰਾ ਪਾਸੇ ਹਟ ਸਾਈਡ ਤੇ ਹੋ ਕੇ ਜਦੋਂ ਫੋਨ ਸੁਣਨ ਗਿਆ ਤਾਂ ਇੱਕ ਪੁਲੀਸ ਕਰਮਚਾਰੀ ਨੇ ਚੋਰ ਤੇ ਰਹਿਮ ਦਿਲੀ ਕਰਦਿਆਂ ਉਸਦੇ ਕੰਨ ਵਿੱਚ ਕੰਨਾਂ ਬਾਟੀ ਕੁਕਰ… ਕਰਕੇ ਗੱਲ ਸਮਝਾ ਦਿੱਤੀ।
ਥਾਣੇਦਾਰ ਫਿਰ ਜਦੋਂ ਚੋਰ ਕੋਲ ਪਹੁੰਚਿਆ ਤਾਂ ਚੋਰ ਉੱਚੀ ਜਿਹੀ ਚੰਗਿਆੜ ਮਾਰਦਾ ਹੋਇਆ ਕਹਿਣ ਲੱਗਾ ਕਿ ਥਾਣੇਦਾਰ ਜੀ ਅਸੀਂ ਚੋਰੀ ਕੀਤਾ ਸਾਰਾ ਸਮਾਨ 'ਹੁਕਮੇਂ ਕਵਾੜੀਏ' ਦੀ ਦੁਕਾਨ ਤੇ ਵੇਚਦੇ ਹਾਂ ਤੇ ਅਸੀਂ ਅਜੇ ਥੋੜਾ ਚਿਰ ਪਹਿਲਾਂ ਹੀ ਇਹ ਧੰਦਾ ਸ਼ੁਰੂ ਕੀਤਾ ਹੈ ਮੈਂ ਪਹਿਲੀ ਵਾਰ ਪੁਲੀਸ ਦੇ ਅੜਿੱਕੇ ਆਇਆ ਹਾਂ……
ਹੂੰ…ਹਾਅ ਹੋਈ ਨਾਂ ਸਾਲਿਆ ਅਸਲੀ ਗੱਲ, ਐਵੇਂ ਘੰਟੇ ਦਾ ਸਾਡੇ ਜਵਾਨਾਂ ਨੂੰ ਵੰਝ ਤੇ ਚੜਾਇਆ ਏ, ਕੁੱਟ ਖਾਈ ਜਾਨੈਂ…
'ਸੋਨੇ ਦੀ ਮੁਰਗੀ' ਤਾਂ ਤੂੰ ਸੀਨੇ ਚ ਲੁਕੋਈ ਬੈਠਾਂ ਸੈਂ…ਅੱਗੇ ਤੋਂ ਵੀ ਖਿਆਲ ਰੱਖੀਂ, ਬੱਸ ਬਈ ਜਵਾਨੋਂ…ਛੱਡੋ ਇਸ ਕੋਹੜ ਨੂੰ। ਬਾਗੋਬਾਗ ਹੋਏ ਥਾਣੇਦਾਰ ਨੇ ਮੁੱਛਾਂ ਨੂੰ ਤਾਅ ਦਿੰਦਿਆਂ ਪੁਲੀਸ ਟੀਮ ਸਮੇਤ ਜਿਪਸੀ ਤੇਜ਼ੀ ਨਾਲ ਹੁਕਮੇਂ ਕਵਾੜੀਏ ਦੀ ਦੁਕਾਨ ਵੱਲ ਨੂੰ ਹਨ੍ਹੇਰੀ ਬਣਾ ਦਿੱਤੀ