ਕੰਡੇ ਦਾ ਕੰਡਾ
ਆਪ ਜੀ ਦਾ ਜਨਮ ਹੋ ਹੀ ਨਹੀਂ ਰਿਹਾ ਸੀ । ਸਮਾਂ ਦਸ ਮਹੀਨੇ ਪੂਰੇ ਹੋ ਚੁੱਕੇ ਸਨ ।ਆਪ ਜੀ ਦੀ ਮਾਤਾ ਜੀ ਨੇ ਉਸ ਉਪਰ ਵਾਲੇ ਅੱਗੇ ਅਰਦਾਸ ਕੀਤੀ ਜਾਂ ਮੇਰੀ ਜਾਨ ਕੱਢ ਲਉ
ਆਪ ਜੀ ਦਾ ਜਨਮ 31 ਮਾਰਚ ਨੂੰ ਪੰਜਾਬ ਦੀ ਧਰਤੀ ਤੇ ਹੋਇਆ । ਉਸ ਦਿਨ ਆਪ ਜੀ ਦੇ ਬਾਪ ਜੀ ਨੇ ਬਹੁਤ ਸ਼ਰਾਬ ਪੀਤੀ ਹੋਈ ਸੀ ਕਿਉਂਕਿ ਉਸ ਦਿਨ ਠੇਕੇ ਟੁੱਟੇ ਹੋਏ ਸਨ ਤੇ ਸ਼ਰਾਬ ਸਸਤੀ ਮਿਲ ਰਹੀ ਸੀ ਆਪ ਜੀ ਦੇ ਜਨਮ ਦੀ ਗੱਲ ਜਦੋਂ ਆਪ ਜੀ ਦੇ ਸ਼ਰਾਬੀ ਬਾਪ ਨੂੰ ਪਤਾ ਲੱਗੀ ਤਾਂ ਉਹਨਾਂ ਨੇ ਇਕ ਢੱਕਣ ਸ਼ਰਾਬ ਦਾ, ਗੁੱਢਤੀ ਦੇ ਰੂਪ ਚ ਆਪ ਜੀ ਦੇ ਮੂੰਹ ਚ ਪਾਅ ਦਿੱਤਾ ਆਪ ਜੀ ਦੇ ਬਾਪ ਜੀ ਨੇ ਆਪ ਜੀ ਦੇ ਜੰਮਣ ਦੀ ਖੁਸ਼ੀ ਚ ਸਾਰੇ ਆਂਢੀ ਗੁਆਂਢੀ ਟੱਲੀ ਕਰ ਦਿੱਤੇ ਤੇ ਕਈਆਂ ਨੂੰ ਉਲਟੀਆਂ ਟੱਟੀਆਂ ਵੀ ਲੱਗੀਆਂ । ਆਪ ਜੀ ਕਮਜੋਰ ਹੋਣ ਕਾਰਨ ਆਪ ਜੀ ਦੇ ਬਾਪ ਜੀ ਨੇ ਕਈ ਵਾਰੀ ਆਪ ਜੀ ਨੂੰ ਅਫੀਮ ਵੀ ਚਟਾਈ । ਆਪ ਜੀ ਨਸ਼ੇ ਚ ਹੋਲੀ ਹੋਲੀ ਵੱਡੇ ਹੋਏ ਤੇ ਆਪ ਜੀ ਨਸ਼ੇ ਚ ਜੰਮੇ ਪਲੇ ਹੋਣ ਕਾਰਨ, ਨਸ਼ੇ ਦੇ ਬਚਪਨ ਤੋਂ ਹੀ ਆਦਿ ਸਨ ਇਸ ਕਰਕੇ ਨਸ਼ਾ ਕਰਨ ਵਿਚ ਆਪ ਜੀ ਨੂੰ ਕੋਈ ਦਿੱਕਤ ਨਹੀਂ ਆਈ । ਆਪ ਜੀ ਦੀ ਮੁਢਲੀ ਸਿਖਿਆ ਬਸ ਮੁੱਢ ਚ ਹੀ ਖਤਮ ਹੋ ਗਈ ਪਰ ਇਕ ਅਫੀਮ ਖਾਣੇ ਮਾਸਟਰ ਨੇ ਆਪ ਜੀ ਨੂੰ ਹਿੰਮਤ ਨਹੀਂ ਹਾਰਨ ਦਿੱਤੀ ਆਪ ਜੀ ਉਸਨੂੰ ਕਦੇ ਘਰ ਦੀ ਕੱਢੀ ਸ਼ਰਾਬ,ਕਦੇ ਅਫੀਮ ਦਿੰਦੇ ਤੇ ਉਹ ਹਾਜਰੀਆਂ ਲਾਉਂਦਾ ਰਿਹਾ ਆਪ ਜੀ ਨੂੰ ਪਤਾ ਹੀ ਨਹੀਂ ਚਲਿਆ ਕਦੋਂ ਆਪ ਪੰਜ ਜਮਾਤਾਂ ਪੜ ਗਏ ਉਸਤੋਂ ਬਾਅਤ ਪ੍ਰਮਾਤਮਾ ਦੀ ਕਰਨੀ ਮਾਸਟਰ ਜੀ ਪੂਰੇ ਹੋ ਗਏ ਤੇ ਆਪ ਜੀ ਪੜਾਈ ਅੱਧ ਵਿਚਕਾਰ ਹੀ ਰਹਿ ਗਈ । ਵੈਸੇ ਤਾਂ ਆਪ ਜੀ ਤੇ ਜਵਾਨੀ ਆਈ ਹੀ ਨਹੀਂ ਪਰ ਕਹਿਣ ਨੂੰ ਤਾਂ ਕਹਿਣਾ ਪੈਣਾ । ਆਪ ਜੀ ਕਈ ਵਾਰੀ ਛੋਟੇ ਮੋਟੇ ਕੇਸ਼ਾਂ ਚ ਜਿਵੇਂ ਸ਼ਰਾਬ ਦਾ ਟਰੱਕ ਫੜਿਆ ਜਾਣਾ,ਡੋਡਿਆਂ ਦਾ ਕੈਂਟਰ,ਅਫੀਮ ਦਾ ਕੈਂਟਰ ਆਦਿ ਪਰ ਆਪ ਜੀ ਆਪਣੀ ਪੈਸੇ ਦੀ ਬੁੱਧੀ ਨਾਲ ਹਰ ਵਾਰ ਸਫਲ ਰਹੇ । ਆਪ ਜੀ ਨੇ ਜਵਾਨੀ ਦੇ ਦਿਨਾਂ ਚ ਕਈ ਜੇਲ ਯਾਤਰਾਵਾਂ ਵੀ ਕੀਤੀਆਂ । ਪਰ ਆਪ ਜੀ ਨੇ ਆਪਣਾ ਨਸ਼ੇ ਦਾ ਕਾਰੋਬਾਰ ਜੇਲ ਚ ਵੀ ਕਰਦੇ ਰਹੇ । ਸਗੋਂ ਜੇਲ ਜਾਣ ਤੋਂ ਬਾਅਦ ਆਪ ਜੀ ਦੀ ਮਾੜੀ ਮੋਟੀ ਝਕ ਬਾਕੀ ਸੀ ਉਹ ਵੀ ਖੁੱਲ ਗਈ । ਆਪ ਜੀ ਹੁਣ ਪੂਰੀ ਤਰਾਂ ਪੱਕ ਚੁਕੇ ਨੇ ਤੇ ਆਪ ਜੀ ਨੇ ਵਰਤਮਾਨ ਸਰਕਾਰ ਨਾਲ ਰਾਬਤਾ ਕਾਇਮ ਕੀਤਾ ਆਪ ਨੇ ਸੂਬੇ ਦੇ ਸੀ.ਐਮ ਸਾਹਬ ਨੂੰ ਨਿਰਾ ਦੁੱਧ (ਅਸਲ ਅਫੀਮ) ਖਵਾ ਕੇ ਨਿਹਾਲ ਕੀਤਾ । ਹੁਣ ਆਪ ਜੀ ਨੂੰ ਸੂਬੇ ਚ ਨਸ਼ਾ ਵੇਚਣ ਦਾ ਲਾਇਸੰਸ ਮਿਲ ਗਿਆ (ਸੀ.ਐਮ. ਵਲੋਂ ਹਰੀ ਝੰਡੀ) । ਆਪ ਜੀ ਪਹਿਲਾਂ ਪਹਿਲਾਂ ਸਰਪੰਚੀ,ਐਮ ਸੀ,ਫੇਰ ਐਮ.ਐਲ.ਏ,ਐਮ.ਪੀ, ਸਾਰੇ ਇਲੈਕਸ਼ਨਾਂ ਦੌਰਾਨ ਆਪ ਜੀ ਨੇ ਰੱਜ ਕੇ ਨਸ਼ਾ ਵੇਚਿਆ । ਇਲੈਕਸ਼ਨਾਂ ਦੌਰਾਨ ਆਪ ਜੀ ਦੀ ਅਗਨੀ ਪਰੀਖਿਆ ਹੋਈ ਉਸ ਵਕਤ ਆਪ ਜੀ ਇਸ ਵਿਚ ਵੀ ਸਫਲ ਰਹੇ ਕਿਉਂਕਿ ਆਪ ਜੀ ਨੂੰ ਯੂਥ ਲਈ ਫੈਂਸੀ ਡਰਿਲ,ਕੋਰੈਕਸ,ਦਸ ਨੰਬਰੀ ਗੋਲੀਆਂ,ਪਰਾਕਸੀਵਨ,ਲੋਮੋਟੈਲ ਟੱਟੀਆਂ ਦੀਆਂ ਗੋਲੀਆਂ,ਆਇਉਡੈਕਸ,ਅਲਪਰੈਕਸ,ਮੁਫਤ ਲੰਗਰ ਲਾਅ ਕੇ ਆਪ ਜੀ ਨੇ ਯੂਥ ਦੇ ਦਿਲਾਂ ਚ ਜਗ੍ਹਾ ਬਣਾਈ ਤੇ ਸਭ ਨੂੰ ਖੁਸ਼ ਕੀਤਾ ਤੇ ਆਪ ਜੀ ਹੁਣ ਲੱਖਾਂ ਕਰੋੜਾਂ ਚ ਨਹੀਂ ਸਗੋਂ ਅਰਬਾਂ ਚ ਖੇਡ ਰਹੇ ਨੇ,ਸਰਕਾਰ ਕੋਈ ਵੀ ਆਵੇ ਪਰ ਆਪ ਜੀ ਦਾ ਕੰਮਕਾਰ ਬਹੁਤ ਵਧੀਆ ਚੱਲ ਰਿਹਾ ਹੈ ਤੇ ਚੱਲੀ ਜਾਣਾ ਹੈ ਕਿਉਂਕਿ ਆਪ ਜੀ ਨੂੰ ਜਾਚ ਆ ਗਈ ਹੈ । ਆਪ ਜੀ ਆਪਣੀਆਂ ਹੁਣ ਏਨੀਆਂ ਬਰਾਂਚਾ ਬਣਾ ਲਈਆਂ ਹਨ ਕਿ ਆਪ ਜੀ ਨੂੰ ਕਿਤੇ ਜਾਣ ਦੀ ਜਰੂਰਤ ਨਹੀਂ । ਆਪ ਜੀ ਦਿਨ ਚੋਗਣੀ ਰਾਤ ਅਠੋਗਣੀ ਤਰੱਕੀ ਕਰ ਰਹੇ ਨੇ । ਆਪ ਜੀ ਕਦੇ ਨਹੀਂ ਮਰ ਸਕਦੇ ਆਪ ਜੀ ਅਮਰ ਹੋ ਗਏ ਹੋ । ਕਿਉਂਕਿ ਜੇ ਆਪ ਜੀ ਨਰਕਵਾਸੀ ਹੋ ਵੀ ਗਏ ਤਾਂ ਆਪ ਜੀ ਦੀਆਂ ਬਹੁਤ ਸਾਰੀਆਂ ਨਜ਼ਾਇਜ਼ ਔਲਾਦਾਂ,ਆਪ ਜੀ ਦੇ ਨਸੇੜੀ ਚੇਲੇ ਬਾਲਕੇ ਯਾਰ ਦੋਸਤ, ਆਪ ਜੀ ਦਾ ਕਮਾਇਆ ਹੋਇਆ ਨਾਮ ਖਤਮ ਨਹੀਂ ਹੋਣ ਦੇਣਗੇ । ਚਾਹੇ ਸੂਬਾ ਖਤਮ ਹੋ ਜਾਵੇ ।