ਯਾਦ ਦਾ ਕਪੜਾ (ਕਵਿਤਾ)

ਕਿਹੜੀ ਯਾਦ  ਦਾ  ਕਪੜਾ
                 ਕਿਨੀ ਦੇਰ   ਹੰਡਾਵਾਂ   ।
                 ਕਿਹੜਾ  ਕਪੜਾ ਪਾਕੇ  ਰਖਾਂ
                 ਕਿਹੜਾ ਮੈਂ  ਲਾਹ  ਪਾਵਾਂ ।
                 ਟੁਕੜੇ  ਟੁਕੜੇ ਹੋਕੇ ਜੀਉਣਾ
                 ਭਟਕਣ  ਵਾਂਗ  ਹਵਾਵਾਂ  ।
                 ਇਸ ਜੀਵਨ ਦੀ ਦਿਸ਼ਾ  ਲਭਣ ਲਈ
                ਕਿਹੜੀ  ਖੇਡ  ਰਚਾਵਾਂ ।
                 ਕਿਉਂ  ਨਾਂ ਡੁਬਦੇ  ਸੂਰਜ ਨਾਲ
                 ਅਜ ਹੀ  ਮੈਂ ਮਰ  ਜਾਵਾਂ ।
                 ਕਲ ਦਾ ਉਗਦਾ  ਸੂਰਜ ਤਕਕੇ
                 ਨਵਾਂ  ਜਨਮ ਮੈਂ  ਪਾਵਾਂ ।
                 ਸੂਰਜ ਲਾਲੀ ਪਿੰਡੇ  ਮਲਲਾਂ
                 ਧੁਪਾਂ ਨਾਲ ਨਹਾਵਾਂ ।
                 ਟੁਕੜੇ ਟੁਕੜੇ ਬਦਲ ਸੀਂਉਕੇ
                 ਪਲੂ  ਨਵਾਂ ਬਣਾਵਾਂ ।
                 ਉਸ ਪਲੂ ਵਿਚ ਬਨ ਖੁਸ਼ਬੋਹਾਂ
                 ਸਬ  ਥਾਂ ਵੰਡਦਾ  ਜਾਵਾਂ ।
                 ਅਧ ਅਧੂਰੇ ਖਾਬ ਨਾਂ ਦੇਖਾਂ
                 ਪੂਰਨਤਾ ਨੂੰ  ਪਾਵਾਂ ।
                 ਮਨ ਚਾਹੀ ਮੇਰੀ  ਦੁਨੀਆਂ ਹੋਵੇ
                 ਮਨ  ਚਾਹਾ ਸਰਨਾਵਾਂ ।
                 ਕਲ ਦੀਆਂ ਲੀਕਾਂ ਸਬ ਮਿਟਾਕੇ
                 ਅਜ ਨੂੰ  ਅਜ  ਹੰਡਾਵਾਂ ।