ਧੰਨ ਗੁਰੂ ਨਾਨਕ (ਗੀਤ )

ਧੰਨ ਗੁਰੂ ਨਾਨਕ ਤੇਰੀ, ਧੰਨ ਵਡਿਆਈ ਏ।
ਅੱਜ ਤੈਂਨੂੰ ਵਾਜਾਂ ਮਾਰੇ, ਸਾਰੀ ਲੋਕਾਈ ਏ।

ਏਕ ਓਂਕਾਰ ਵਾਲਾ, ਸਬਕ ਤੈਂ ਪੜ੍ਹਾਇਆ ਏ।
ਕਰਨਾ ਹੈ ਸੱਚਾ ਸੌਦਾ, ਅਸਾਂ ਨੂੰ ਸਿਖਾਇਆ ਏ।
ਚਾਰੇ ਪਾਸੇ ਰੱਬ ਦੀ ਤੂੰ, ਹੋਂਦ ਵਿਖਾਈ ਏ
ਧੰਨ........

ਜੱਗ ਉੱਤੇ ਮੱਸਿਆ ਦੀ, ਰਾਤ ਕਾਲੀ ਛਾਈ ਸੀ।
ਕੂੜ੍ਹ ਵਾਲੀ ਮੈਲ ਸਾਡੇ , ਦਿਲਾਂ ਉੱਤੇ ਆਈ ਸੀ।
ਪੁੰਨਿਆਂ ਦੇ ਚੰਨਾਂ ਤੂੰ ਤਾਂ, ਕੀਤੀ ਰੁਸ਼ਨਾਈ ਏ
ਧੰਨ.........

ਕੌਡੇ ਜਿਹੇ ਰਾਖਸ਼, ਮੁਰੀਦ ਤੇਰੇ ਹੋ ਗਏ।
ਠਗਾਂ ਕੀਤੇ ਸਜਦੇ ਜਾਂ, ਦੀਦ ਤੇਰੇ ਹੋ ਗਏ।
ਤਪਦੀ ਲੋਕਾਈ ਨੂੰ ਤੂੰ, ਠੰਢ ਵਰਤਾਈ ਏ
ਧੰਨ.........

ਜਾਤ ਪਾਤ ਵਾਲਾ ਭੇਦ, ਜੱਗ 'ਚੋਂ ਮਿਟਾਇਆ ਏ।
ਭਰਮਾਂ 'ਚੋਂ ਕੱਢ ਸੱਚਾ, ਰਸਤਾ ਦਿਖਾਇਆ ਏ।
ਜੋਗੀਆਂ ਤੇ ਸਿੱਧਾਂ ਸੰਗ, ਗੋਸ਼ਟਿ ਰਚਾਈ ਏ
ਧੰਨ.........

ਬਾਣੀ ਵਾਲੇ ਬਾਣ ਤੇਰੇ, ਜੱਗ ਨੂੰ ਝੁਕਾਇਆ ਸੀ।
ਬਾਬਰ ਜਿਹੇ ਜਾਬਰਾਂ ਵੀ, ਸੀਸ ਨਿਵਾਇਆ ਸੀ।
ਔਰਤ ਦੇ ਹੱਕ 'ਚ, ਅਵਾਜ਼ ਤੂੰ ਉਠਾਈ ਏ
ਧੰਨ.........

ਸੱਜਣਾ ਜਿਹੇ ਠੱਗ ਅੱੱਜ, ਲੁੱਟ ਪਏ ਮਚਾਉਂਦੇ ਨੇ।
ਭਾਗੋਆਂ ਦੇ ਟੋਲੇ ਅੱਜ, ਮਹਿਫਲਾਂ ਸਜਾਉਂਦੇ ਨੇ।
ਲਾਲੋਆਂ ਦੀ 'ਦੀਸ਼' ਏਥੇ, ਨਹੀਉਂ ਸੁਣਵਾਈ ਏ
ਧੰਨ.........