ਦੋ ਮਿੰਨੀ ਵਿਅੰਗ (ਵਿਅੰਗ )

ਸਾਧੂ ਰਾਮ ਲੰਗਿਆਣਾ (ਡਾ.)    Email: dr.srlangiana@gmail.com Address: ਪਿੰਡ ਲੰਗੇਆਣਾ ਮੋਗਾ India ਸਾਧੂ ਰਾਮ ਲੰਗਿਆਣਾ (ਡਾ.) ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ

ਬਾਬਾ ਜੀ ਆਹ ਚੱਕੋ ਆਵਦਾ ਤਵੀਤ… ਤੁਸੀਂ ਤਾਂ ਤਵੀਤ ਦੇਣ ਸਮੇਂ 'ਫੁੱਲ ਗਰੰਟੀ' ਦਿੱਤੀ ਸੀ। ਕਿ ਭਾਈ ਤੇਰੇ ਪਤੀ ਦਾ ਵਾਲ ਵਿੰਗਾ ਵੀ ਹੋ ਜਾਵੇ, ਤਾਂ ਮੇਰੀ ਫੁੱਲ ਗਰੰਟੀ ਐ… ਪ੍ਰੰਤੂ ਬਾਬਾ ਜੀ ਮੈਂ ਜਿਉਂ ਹੀ ਥੋਡੇ ਕੋਲੋਂ ਤਵੀਤ ਲਿਜਾ ਕੇ ਆਪਣੇ ਬਿਮਾਰ ਪਏ ਪਤੀ ਪ੍ਰਮੇਸ਼ਰ ਦੇ ਗਲ 'ਚ ਪਾਇਆ ਸੀ। ਉਹ ਤਾਂ ਵਿਚਾਰਾ ਉਸੇ ਰਾਤ ਹੀ ਪ੍ਰਲੋਕ ਸਿਧਾਰ ਗਿਆ ਸੈਂ, ਲਿਆਓ ਮੋੜੋ ਮੇਰਾ ਪੰਜ ਸੌ…।
   ਭਾਈ ਬੀਬਿਆ ਮੈਂ ਥੋਨੂੰ ਗਰੰਟੀ ਇਹ ਕਹਿਕੇ ਦਿੱਤੀ ਸੀ। ਕਿ ਤੇਰੇ ਪਤੀ ਦਾ ਕੋਈ ਵਾਲ ਵੀ ਵਿੰਗਾ ਹੋ ਜਾਵੇ ਤਾਂ ਫੁੱਲ ਗਰੰਟੀ ਐ…।
    ਪਰ ਬਾਬਾ ਜੀ… ਕਿੱਧਰ ਗਈ ਫਿਰ ਥੋਡੀ ਫੁੱਲ ਗਰੰਟੀ…?
            ਭਾਈ ਬੀਬਿਆ ਮੇਰੀ ਗੱਲ ਵੱਲ ਜ਼ਰਾ ਧਿਆਨ ਦੇ…ਕਿ ਮੌਤ ਸਮੇਂ ਜਾਂ ਮੌਤ ਉਪਰੰਤ ਤੇਰੇ ਪਤੀ ਦੀਆਂ ਮੁੱਛਾਂ-ਦਾੜ੍ਹੀ, ਭਰਵੱਟੇ ਜਾਂ ਸਿਰ ਦਾ ਜੇਕਰ ਕੋਈ ਵਾਲ ਵਿੰਗਾ ਹੋਇਆ ਸੀ। ਤਾਂ ਦੱਸ…ਮੌਤ ਤਾਂ ਇੱਕ ਅਟੱਲ ਸੱਚਾਈ ਐ… ਨਾਲੇ ਬਾਬਿਆਂ ਦੀ ਵਾਲ ਵਿੰਗਾ ਹੋਣ ਦੀ ਅੱਜ ਵੀ ਫੁੱਲ ਗਰੰਟੀ ਐ…
ਬਾਬਾ ਜੀ…ਹੈਂ…?
--------------------------------

ਇਕੱਤੀ ਮਾਰਚ ਵਾਲੇ ਦਿਨ 'ਤਾਇਆ ਨਰੈਂਣਾ' ਸ਼ਰਾਬ ਦਾ ਅਧੀਆ ਡਕਾਰ ਕੇ ਜਿਉਂ ਹੀ ਸਵੇਰੇ ੧੦ ਕੁ ਵਜੇ ਘਰੋਂ ਬਾਹਰ ਜਾਣ ਉਪਰੰਤ ਅੱਧੇ ਕੁ ਘੰਟੇ ਬਾਅਦ ਘਰ ਵਾਪਿਸ ਪਰਤਿਆ, ਤਾਂ ਉਸਨੇ ਘਰ ਦੀ ਇੱਕ ਨੁੱਕਰ 'ਚ ਬੈਠ ਕੇ ਉੱਚੀ-ਉੱਚੀ ਰੋਣਾ-ਕੁਰਲਾਉਣਾ ਸ਼ੁਰੂ ਕਰ ਦਿੱਤਾ,  ਤਾਏ ਨੂੰ ਦੇਖ ਕੇ ਟੱਬਰ ਦੇ ਬਾਕੀ ਜੀਅ ਵੀ ਏਸ ਗੱਲ ਨੂੰ ਸਮਝਦਿਆਂ ਅੱਡੋ-ਅੱਡੀ ਕਮਰਿਆਂ 'ਚ ਬੈਠ ਕੇ ਰੋਣ ਲੱਗ ਪਏ, ਕਿ ਜ਼ਰੂਰ ਪ੍ਰੀਵਾਰਕ ਮੈਂਬਰ 'ਗੱਗੂ', ਜੋ ਨੌਵੀਂ ਜਮਾਤ ਦਾ ਵਿਦਿਆਰਥੀ ਹੈ, ਅੱਜ ਇਕੱਤੀ ਮਾਰਚ ਨੂੰ ਨਤੀਜਾ ਆਉਣ 'ਤੇ ਫੇਲ੍ਹ ਹੋ ਗਿਆ ਹੋਵੇਗਾ, ਜਿਸਦਾ ਤਾਏ ਨੂੰ ਪਤਾ ਲੱਗ ਜਾਣ ਕਾਰਨ ਘਰ ਦਾ ਮਾਹੌਲ ਚਿੰਤਾਜਨਕ ਬਣ ਗਿਆ ਹੈ। ਅਜੇ ਸਾਰੇ ਟੱਬਰ 'ਚ ਰੋਣ-ਧੋਣ ਦਾ ਸਿਲਸਿਲਾ ਜਾਰੀ ਸੀ। ਕਿ ਏਨੇ ਨੂੰ ਸਕੂਲੋਂ ਵਾਪਿਸ ਪਰਤਿਆ ਗੱਗੂ ਚੜਚੋਲਾਂ ਪਾਉਂਦਾ ਹੋਇਆ ਘਰ ਅੰਦਰ ਦਾਖਲ ਹੋ ਕੇ ਨੱਚਣ ਕੁੱਦਣ ਲੱਗ ਪਿਆ। ਜਿਉਂ ਹੀ ਗੱਗੂ ਦਾ ਪਾਸ ਹੋਣਾ ਘਰ ਦੇ ਬਾਕੀ ਮੈਂਬਰਾਂ ਨੂੰ ਪਤਾ ਚੱਲਿਆ, ਤਾਂ 'ਤਾਈ ਨਿਹਾਲੀ' ਨੇ ਤਾਏ ਨਰੈਂਣੇ ਨੂੰ ਭਰੋਸਾ ਦਿੰਦਿਆਂ ਦੱਸਿਆ, ਕਿ ਨਰੈਂਣਿਆਂ ਸੁੱਖ ਨਾਲ ਆਪਣਾ ਪੋਤਰਾ ਤਾਂ ਚੰਗੇ ਨੰਬਰ ਲੈ ਕੇ ਪਾਸ ਹੋਇਆ ਐ, ਤੈਨੂੰ ਕਿਸੇ ਨੇ ਐਵੇਂ ਝੂਠ ਬੋਲ ਦਿੱਤਾ ਐ, ਕਿ ਗੱਗੂ ਫੇਲ੍ਹ ਐ, ਤੂੰ ਐਵੇਂ ਮਨ ਖਰਾਬ ਨਾ ਕਰ…।
          ਉਏ ਕਮਲੀਏ ਨਿਹਾਲੀਏ, ਸਿਧਰੀਏ ਕਿਸੇ ਥਾਂ ਦੀਏ… ਮੈਂ ਗੱਗੂ ਦੇ ਪਾਸ-ਫੇਲ੍ਹ ਨੂੰ ਲੈ ਕੇ ਨਈਂ੍ਹ ਰੋਂਦਾ ਪਿੱਟਦਾ… ਮੈਂ ਤਾਂ ਅੱਜ ਜਿਉਂ ਹੀ ਇਕੱਤੀ ਮਾਰਚ ਸਮੇਂ ਸਸਤੀ ਸ਼ਰਾਬ ਨੂੰ ਮੁੱਖ ਰੱਖ ਠੇਕੇ ਤੇ ਪਹੁੰਚਿਆ ਸਾਂ, ਤੇ ਉੱਥੇ ਮੈਨੂੰ ਪਤਾ ਚੱਲਿਆ, ਕਿ  ਏਸ ਵਾਰ ਤਾਂ ਇਕੱਤੀ ਮਾਰਚ ਵੀ ਬੱਤੀ ਮਾਰਚ ਹੀ ਬਣ ਗਈ ਹੈ ਕਿਉਂਕਿ ਦਾਰੂ ਦੀ ਬੋਤਲ ਦੀ ਕੀਮਤ ਤਾਂ ਇਕੱਤੀ ਮਾਰਚ ਨੂੰ ਘਟੀ ਹੀ ਨਹੀਂ, ਸਗੋਂ ਵਧ ਗਈ ਹੈ। ਤੇ ਅਗਾਂਹ ਨੂੰ ਵੀ ਕੀਮਤ ਡੇਢੀ ਹੋ ਗਈ ਹੈ ।