ਮੇਰਾ ਪਿੰਡ (ਹਾਇਕੁ) (ਕਵਿਤਾ)

1.
ਹੱਟੀ 'ਤੇ ਜਾਣਾ
ਅੱਠ ਆਨੇ ਦਾ ਸੌਦਾ
ਰੂੰਗਾ ਲੈ ਖਾਣਾ।

2.
ਅੰਬੋ ਪਕਾਵੇ
ਨਾਲ਼ੇ ਕਰੇ ਗਿਣਤੀ
ਦੋ-ਦੋ ਸਭ ਨੂੰ।

3.
ਭੜੋਲਾ ਖਾਲੀ
ਪੀਹਣਾ ਕਰਨ ਨੂੰ
ਛੱਜ ਭਾਲਦੀ ।

4.
ਹਨ੍ਹੇਰੀ ਠੰਢ
ਰਾਤੀਂ ਦੇਵੇ ਪਹਿਰਾ
ਬਾਪੂ ਦੀ ਖੰਘ ।

5.
ਜੋੜ ਬਦਲ਼
ਕੱਖ-ਪੱਠਾ ਲੱਦਦਾ
ਗੱਡੇ 'ਤੇ ਬਾਪੂ।

6.
ਪੁਰਾਣਾ ਘਰ
ਵਿਹੜੇ 'ਚ ਖੜਕੇ
ਬਾਪੂ ਦਾ ਖੂੰਡਾ। 

7.
ਨਿੰਮਾਂ ਦੀ ਛਾਵੇਂ 
ਤਿੱਖੜ ਦੁਪਹਿਰੇ
ਲੱਗਾ ਤ੍ਰਿੰਝਣ ।

8.
ਹੱਥ ਪੂਣੀਆਂ
ਢਾਕ ਚੱਕ ਚਰਖਾ
ਚੱਲੀ ਕੱਤਣ।

9.
ਤੱਕਲ਼ੇ ਤੰਦ
ਬੋਈਏ 'ਚ ਪੂਣੀਆਂ
ਤ੍ਰਿੰਝਣੀ -ਛੋਪ।

10.
ਬੈਠ ਤ੍ਰਿੰਝਣ
ਘੂਕਰ ਸੁਰ ਮਿਲਾ
ਕੱਤੇ ਚਰਖਾ। 

11.
ਕੁੱਕੜ ਬਾਂਗ
ਚਹਿਕਣ ਚਿੜੀਆਂ
ਸਰਘੀ ਵੇਲ਼ਾ । 

12.
ਕੱਖ ਪੱਠਾ ਪਾ
ਸੁਆਣੀ ਧਾਰਾਂ ਚੋਵੇ
ਚੜ੍ਹਦੀ ਟਿੱਕੀ । 

13.
ਚੜ੍ਹੇ ਵਿਸਾਖ
ਸੁਨਹਿਰੀ ਬੱਲੀਆਂ
ਖੇਤੀਂ ਝੂਮਣ ।

14.
ਚੁੰਮਦੀ ਦਾਤੀ
ਕਣਕ ਸੋਨੇ-ਰੰਗੀ
ਬਿਖਰੇ ਮੋਤੀ।

15.
ਪੱਕੀ ਕਣਕ
ਬੱਦਲ਼ ਗਰਜਣ
ਡਰਦਾ ਮਨ।

16.
ਉਡਾਵੇ ਕਾਮਾ
ਕਣਕ ਦਾ ਬੋਹਲ਼
ਛਜਲ਼ੀ ਫੜ ।

17.
ਪੁਰਾਣਾ ਘਰ
ਬੈਠਕ 'ਚ ਅੰਗੀਠੀ
ਬਾਬੇ ਦੀ ਫੋਟੋ।

18.
ਪੀਂਘ ਚੜ੍ਹਾਵੇ 
ਕੰਨੀਂ ਪਾਏ ਲੋਟਣ 
ਲੈਣ ਹੁਲਾਰੇ ।

19.
ਚੁੱਲ੍ਹੇ ਪਤੀਲੀ 
ਗੁੜ ਦੀ ਚਾਹ ਧਰੀ 
ਗੜਬੀ ਭਰੀ।

20.
ਆਥਣ ਵੇਲ਼ਾ
ਅੰਮੜੀ ਦਾ ਵਿਹੜਾ
ਛਿੜਕਾਂ ਪਾਣੀ।