ਨਵੇਂ ਸਾਲ ਦੀ ਨਿਸ਼ਾਨੀ
(ਕਵਿਤਾ)
ਨਵੇਂ ਸਾਲ ਦੀ ਨਿਸ਼ਾਨੀ , ਮੇਰੇ ਗਲ ਤੇਰੀ ਗਾਨੀ ।
ਭੁੱਲ ਨਾ ਤੂੰ ਜਾਵੀਂ , ਸੁਣ ਮੇਰੇ ਦਿਲ ਜਾਨੀ ।
ਜੋ ਬੀਤੀਆਂ ਬਿਤਾਈਆਂ,ਹੁਣ ਹੋਰ ਨਾ ਤੂੰ ਛੇੜੀਂ ।
ਤੂੰ ਪਿਆਰ ਦੀਆਂ ਗੱਲਾਂ ਕਰ, ਮੁੱਖ ਮੇਰਾ ਖੇੜੀਂ ।
ਫੇਰ ਨਵੀਆਂ ਬਹਾਰਾਂ ਵਿਚ ਖ਼ਿੜੇ ਜ਼ਿੰਦਗਾਨੀ ,
ਨਵੇਂ ਸਾਲ ਦੀ ਨਿਸ਼ਾਨੀ , ਮੇਰੇ ਗਲ ਤੇਰੀ ਗਾਨੀ ।
ਭੁੱਲ ਨਾ ਤੂੰ ਜਾਵੀਂ.......................................।
ਜੇ ਪੱਤਝੜ ਲੰਘੀ , ਹੁਣ ਆਊਗੀ ਬਹਾਰ ਵੇ।
ਤੇਰੇ ਬਿਨਾ ਹੋਇਆ ਚੰਨਾ, ਸੁੱਨਾ ਸੰਸਾਰ ਵੇ ।
ਤੁੰ ਇਕ ਵਾਰੀ ਤੱਕ , ਮੇਰੀ ਚੜ੍ਹਦੀ ਜਵਾਨੀ ,
ਨਵੇਂ ਸਾਲ ਦੀ ਨਿਸਾਨੀ , ਮੇਰੇ ਗਲ ਤੇਰੀ ਗਾਨੀ।
ਭੁੱਲ ਨਾ ਤੂੰ ਜਾਵੀਂ .....................................।
ਲਾਲ ਸੂਹੇ ਫ਼ੁੱਲ ਵਾਂਗ , ਸੋਹਣਾ ਮੇਰਾ ਮੁੱਖ ਵੇ।
ਦਿਨੇ ਰਾਤ ਮੰਗਦੀ ਹਾਂ , ਚੰਨਾ ਤੇਰੀ ਸੁੱਖ ਵੇ ।
ਵੇ ਤੇਰਿਆਂ ਖ਼ੁਆਬਾਂ 'ਚ ਮੈਂ, ਹੋਈ ਹਾਂ ਦੀਵਾਨੀ,
ਨਵੇਂ ਸਾਲ ਦੀ ਨਿਸ਼ਾਨੀ , ਮੇਰੇ ਗਲ ਤੇਰੀ ਗਾਨੀ।
ਭੁੱਲ ਨਾ ਤੂੰ ਜਾਵੀਂ......................................।
ਜੇ "ਸੁਹਲ" ਨੁਸ਼ਹਿਰੇ ਵਾਲਾ, ਆ ਜਾਏ ਅੱਜ ਵੇ।
ਮੁੱਖ਼ ਉਹਦਾ ਚੁੱਮ-ਚੁੱਮ , ਕਰ ਲਊਂਗੀ ਰੱਜ ਵੇ ।
ਇਹ ਦਿਲ ਦੁੱਖੜੇ ਦਾ , ਹੋਰ ਨਾ ਕੋਈ ਸਾਨੀ ,
ਨਵੇਂ ਸਾਲ ਦੀ ਨਿਸ਼ਾਨੀ , ਮੇਰੇ ਗਲ ਤੇਰੀ ਗਾਨੀ।
ਭੁੱਲ ਨਾ ਤੂੰ ਜਾਵੀਂ, ਸੁਣ ਮੇਰੇ ਦਿਲ ਜਾਨੀ।
-------------------------------------------