ਹਾਲੋਂ ਹੋਈ ਬੇਹਾਲ
ਬੰਦੇ ਦੀ ਜ਼ਿੰਦਗੀ
ਤਾਲੋਂ ਹੋਈ ਬੇਤਾਲ
ਬੰਦੇ ਦੀ ਜ਼ਿੰਦਗੀ
ਨਾ ਥਿਰਕਣ ਦਿਸਦੀ ਅੰਗਾਂ ਵਿਚ
ਨਾ ਹੋਠਾਂ ਤੇ ਮੁਸਕਾਨ ਦਿੱਸੇ
ਨਾ ਲਿਸ਼ਕ ਦਿੱਸੇ ਵਿਚ ਨੈਣਾਂ ਦੇ
ਨਾ ਬੋਲਾਂ ਵਿਚ ਸਵੈਮਾਨ ਦਿੱਸੇ
ਡੁੱਬਾ ਹੋਇਆ ਸੋਚਾਂ ਵਿਚ
ਹਰ ਬੰਦਾ ਈ ਪ੍ਰੇਸ਼ਾਨ ਦਿੱਸੇ
ਜੀਅ ਦਾ ਬਣੀ ਜੰਜਲ
ਬੰਦੇ ਦੀ ਜ਼ਿੰਦਗੀ
ਹਾਲੋਂ ਹੋਈ ਬੇਹਾਲ.......
ਸਾਂਝਾਂ ਦੇ ਪੁਲ ਟੁੱਟ ਗਏ
ਹਰ ਪਾਸੇ ਆਪਾ ਧਾਪੀ ਹੈ
ਨਾ ਕੌਡੀ ਮੁੱਲ ਸ਼ਰਾਫਤ ਦਾ
ਹਰ ਥਾਂ ਪ੍ਰਧਾਨ ਚਲਾਕੀ ਹੈ
ਜਿੰaਦਗੀ ‘ਚੋਂ ਮੁੱਲ ਮਨਫੀ ਨੇ
ਮੁੱਲਾਂ ਬਿਨਾਂ ਕੰਗਾਲ
ਬੰਦੇ ਦੀ ਜ਼ਿੰਦਗੀ
ਹਾਲੋਂ ਹੋਈ ਬੇਹਾਲ.......
ਹਰੇ ਭਰੇ ਵੱਢ ਰੁੱਖਾਂ ਨੂੰ
ਸੜਕਾਂ ਦੇ ਜਾਲ ਵਿਛਾ ਲਏ
ਹਵਾ, ਪਾਣੀ ਪ੍ਰਦੂਸ਼ਤ ਕਰ
ਕਈ ਰੋਗ ਦੇਹੀ ਨੂੰ ਲਾ ਲਏ
ਨਾਸ਼ ਕਰਨ ਲਈ ਜੀਵਨ ਦਾ
ਪ੍ਰਮਾਣੂ ਬੰਬ ਬਣਾ ਲਏ
ਵੱਲ ਹਨੇਰੇ ਛਾਲ
ਬੰਦੇ ਦੀ ਜ਼ਿੰਦਗੀ
ਹਾਲੋਂ ਹੋਈ ਬੇਹਾਲ.......
ਆਓ ਗਵਾਚੀ ਲੱਭ ਕੇ ਝਾਂਜਰ
ਜ਼ਿੰਦਗੀ ਪੈਰੀਂ ਪਾਈਏ
ਸੁਰ ਤਾਲ ਵਿਚ ਗਾਉਣ ਨੱਚਣ ਦੀ
ਇਸ ਨੂੰ ਜਾਚ ਸਿਖਾਈਏ
ਜੀਣ ਦਾ ਮਕਸਦ ਭੁੱਲ ਚੁੱਕੀ ਨੂੰ
ਮਕਸਦ ਯਾਦ ਕਰਾਈਏ
ਪਾਵੇ ਫੇਰ ਧਮਾਲ
ਬੰਦੇ ਦੀ ਜ਼ਿੰਦਗੀ
ਨਾ ਹਾਲੋਂ ਹੋਏ ਬੇਹਾਲ
ਬੰਦੇ ਦੀ ਜ਼ਿੰਦਗੀ
ਨਾ ਤਾਲੋਂ ਹੋਏ ਬੇਤਾਲ
ਬੰਦੇ ਦੀ ਜ਼ਿੰਦਗੀ